Political party-te inpuh tawnna kawngpui

Congress ṭhalai (MPYCC) chuan thuchhuah siamin, MNF sorkarin hmun hrang hranga kawng an siam chu kum khat pawh a tlin hmain a chhe nasa hle a, a zahthlak an tih thu an sawi rualin siam ṭha turin sorkar an phut a; Assembly House-a kawngpui an siam ṭhat avanga lawmthu sawina an neihte leh Minister ṭhenkhatin MNF sorkar hnua kawngpui zawng zawng siam ṭha tawh anga an sawite chu a rintlak loh thu leh an insawi anga siam ṭha vek turin an phût. 

Congress-in kum 10 chhung ro an rel a, he mi chhung hian Mizoramah kawng tam tak an siam thar a, kawngpui chhe deuhte an thawm ṭha a, kawngte pawh ṭha taka chei hunlai an nei. Nimahsela kum 10 an sorkar hun tawp lamah erawh kawngpui chu a chhe satliah mai ni loin zawh hleihtheih loh khawpin a awm a, mipui an phun a, thuneitu lamin an ngawihsan a, an tlak phah ta ni pawhin a sawi theih hial ang. Mipuiin na taka an sawisel tur hial khawpin Congress khan Mizoram kawngpuite an hnutchhiah a ni.

MNF-in sorkarna vawn fung an chelh chiah a, kawngpui siamna tur sum ṭhahnem tak a awm sa bakah a khuain a zir bawk nen, an hna hmasaah kawngpui siam ṭhat an nei a, mipui pawh an lawm hle. MNF hruaitute chuan an kawngpui siam ṭhat an chhuang a ni mai lo a, Lok Sabha inthlan dawna an au hla zinga mi a ni. June, 2019-ah phei chuan MNF member pakhatin assembly House-ah private resolution pu lutin MNF-in hun rei lo te chhunga kawngpui chak taka an siam ṭhat avanga lawmthu sawina an nei hial a ni. 

MNF-in kum khat pawh sorkarna vawn fung an chelh hmain Mizoramah kawngpui chhia avanga phun thawm a ring leh ṭan a, an tlin hlima kawngpui an siamte pawh chu fur khat pawh dawl loin a lo chhe leh hman ta. Tunah chuan Congress lam an rawn au chhuak a, Mizorama kawngpui pawimawh ṭhenkhate chhiat thu an tlangaupui a, zin veivakte tana harsatna siam khawp leh lirthei tana zawh harsa khawpa chhiate pawh a awm leh ta. 

Engpawhnise Mizoram enkawl tawhtu kan sorkar neih tawhte hian mipui lungawina khawpin kawngpui hi an siam thei lo a ni mai lo a, fur khat daih kawngpui siam pawh an harsat ve ve tih a takin kan hmu. Kan rama political party liana ngaih pahnihte'n kan kawngpui an chai dan hi chu mipui lung a awi mawlh lo ang.