Sorkar laipui dawr thu

Mizorama sorkar thar kan neih hnuah Mizoram sorkar minister-te Delhi lamah sorkar laipui dawrin an kal nual tawh a, tun hnaiah Health minister leh Rural Development minister-te pawh sorkar laipui lam dawrin an zin chhuak a ni.

Sorkar inthlaka thil lawmawm tak mai kan hmuh chu sorkar laipui lama thu neitu sang zawkte dawr tura kan minister-te an zin chhuak ṭhin hi a ni. Zep thu a cheng lo a, Mizoram dinhmun hi kan hre vek a, thawh chhuah sawi tham kan neih loh avangin sorkar laipui aṭanga sum hai chhuah thiam hi kan state tan a pawimawh a, chumi kawngah chuan thuneitute taima taka dawr hi a ṭul hle reng a ni.

Ka ram hotu lute hi kan sum hnar ber an nih miau avangin kan dawr taimak na na na chuan a hlawhtlinna chinte a awm ngai a, tun hnaia kan ram hruaitute zin chhuak pawh hian rah ṭha a chhuah ngei ang. Kan chief minister zin chhuakin "Kan zuk vaw dup" a tihte pawh kha ṭhenkhatin fiamthu thawhna atan hmang zui bawk mah se, hna ṭha tak a zuk thawk ngei niin a lang. Vawi khat zin chhuaha pawisa hawn nghal duak duak theih a ni lo a, a pawisa faia a zuk sawi chhuah loh avanga hlawhchhama ngaia 'vuak dup' tih lo nuihzat hi thil finthlak ber a ni lo ang. 

Kan state-in thawh chhuah a neih loh avangin kan sum hnar ber chu sorkar laipui an ni a, anni dawr taima leh kawng hmang fel tak nena dawr hian rah ṭha a chhuah ṭhin. Mizoram tan kan minister-te hi feh chhuak zel se, rah ṭha a chhuah ngei ang tih a rinawm.