Kawnpui-Sairang kawngpui chhe reng hi

Mizoram Truck Owners' Association (MTOA) chuan NH-54 Kawnpui leh Sairang inkar kawngpui chu October 16, 2019 hmaa siam a nih loh chuan October 17 aṭangin truck-te an tlântír tawh dawn loh thu tun hnai khan chief minister hnenah an thlen a; chief minister chuan chak taka hna thawh a nih tur thu a lo hrilh. 

Mizorama kawng­pui pawimawh ber ang hiala chhal theih, kan mamawh chakkhai zawng zawng lo luhna chu Kawnpui-Sairang kawngpui hi a ni a, motor lianin an zawh ber kawng a ni. He kawngpui hi rei ngial siam a nih hnuah hun rei vak lo chu mam ṭha takin zawh fel a ni a; nimahsela lirthei tana tlan hleihtheih loh khawpin a chhe zui a, Congress-in an mualpho pui tawh a, tunah MNF-in an hmingchhiat phah leh mek tiin a sawi theih ang. 

He kawngpui hi laih zawh a nih hnuah phei hi chuan hmun rem tak, zâl ṭha tak a ni a, lirthei tlak hlauhawmna tur pawh awm mang lo khawpin tlâng ram ni si-ah chuan a ram hi a ṭha. Chutihlaiin tunah hian motor te chi chu sawi loh motor lian pawh an tlan hleithei lo a, an tâng a, lirthei ṭhenkhat kawng chhiat vangin a let bawk a, harsatna an tawk nasa hle. Truck neitu intel khawm pawl MTOA chuan PWD hotute lam an biak hlawhchham hnuah a tawpa tawpah chief minister an hmu ta ringawt a ni ber mai. 

MTOA hian kawng­pui siam a nih loh chuan an tlan tawh loh tur thu leh, vai ho truck pawh an tlan loh tur thu an sawi chiang tawh a, chu chu a thlen vaih chuan Mizoram hi a phek buaiin kan buai dawn tihna a ni. Kan nitin mamawh phurtute au chhuah ngai hial khawpa kawngpui chhe taka hnutchhiah a ni hi sorkar mualphona lian tak a ni a, hman ni lawka Assembly rorel in sang meuha kawngpui ṭhat avanga lawmthu sawina an neihte nen phei chuan thil inhmeh lo tak a ni. 

Sorkar hian Mizorama kawng­pui zawng zawng a siam ṭha thei lo a nih pawhin, mipui nitin mamawh phurh luhna kawng tal hi chu a siam ṭha ngei tur a ni.