Thlawhtheihna service belh

GoAir thlawhtheihna chu Aizawl (Lengpui)-ah a thlâwk ṭan a, Aizawl - Guwahati inkara GoAir thlawhtheihna thlâwk hmasa ber chu October 15 khan Lengpui Airport-ah chief minister-in a vailiam. 

February 10, 2019-a Jet Airways-in Mizorama ser­vice an tihtawp hnuah Mizoram leh Guwahati inkarah thlawhna thlâwk a awm lo a, Lengpui aṭangin Air India thlawhtheihna Kolkata aṭanga lo kal tih loh chu eng thlawhtheihna mah a lo ṭum ta lo. Mizoramah thlawhtheihna thlawk a tlem avangin mipuiin harsatna nasa tak an tawk a, a bikin hmanhmawh thila damlo phai pan ngaiin an tuar nasa zual niin a lang. 

Thlawhtheihna service tlem chhan hi sawi dan a inang lo a, Lengpui Airport runway ṭhat loh vanga sawi pawl awm bawk mah se chu chu a chhan niin a lang lo. Tunah thlawhtheihna service thar a lo awm ta hi a lawmawm a, mipui harsatna tam tak chu a chhawk ngei ang. 

Hetihlai hian private airline pakhat­in zin veivahna thar an neih belh tur state khat chief minister meuhin a lo vai liam hi chu thil thleng khat tak a nih a rinawm. Engpawhnise a lawmawm ber chu mipuiin thlawhtheihna service ṭhahnem zawk hman tur an nei ta hi a ni a, kan state aṭanga khualzin lut leh chhuak an ṭhahnem ve tawh a, tun aia tam zawk neih belh pawh hi kan phu a, private airlines tam zawk lo lut belh zel se a ṭha ngawt mai.