Zirna uar

YMA General Conference vawi 72-na, North Vanlaiphai-a neih chuan, kum 2019-2021 chhunga YMA kumpuan atan 'zirna uar' an thlang. 

Central YMA hian hun rei tak chhung chu kum puan hi an nei ṭhin a, rah ṭha tak a chhuah. Mizorama pawl lian berin thapui thawha a beihnaah hian mipui an ṭangrual ṭhin a, chuvangin YMA hawi lam hi chu a kaw duak duak ṭhin a ni ber. Tun hnaia a kal danah ṭhahnemngaih luat vangin duh khawp lohna awm ṭhin bawk mah se, YMA-in tha a thawhna lam hi chu ram leh hnam tana ṭha tur zel a ni a, rah duh­awm tak a chhuah ṭhin.

YMA-in kum puana ‘zirna uar’ a nei tur hi a lawmawm takzet a, hei hian tun hnaiah Mizote zirna lamah kan ṭhangharh mek, ti zawngin a thlir theih ang. Central service hrang hranga Mizo ṭhalaite tlin theih loh thu leh, heti zela kan kal chuan kan hma lawkah hnam dang officer lianin kan state an enkawl tur thu sawi ṭhin a ni. Hei hian tun hnaiah zirnaa ṭhahnemngai zual turin Mizo ṭhalaite ṭan a laktir a, YMA lamin an kalpui zui tur hi a lawmawm takzet a ni. 

Mizote hi zirna lamah hian kan hnufual ngai lo a, India hmar chhak tribal zingah pawh tun hma chuan zirna inelna hrang hranga record nei ṭha kan ni ṭhin a, tun hnaiah central service lamah hian kan tlahniam ta deuh. Hetihlai hian tun hmaa kan la hlawhtlin ngai lohna line hrang hrangah hlawhtlinna kan nei a, zirnaa tlahniam kan intih hian UPSC result aṭang ringawta in teh palh a hlauhawm ve tho mai. 

Engpawhnise CYMA-in zirna uar kum a puang hian rah ṭha tak a chhuah ngei ang tih a rin theih a; Mizoramah zirna kawnga inelna ṭha a awm theihna tur te, Mizoram chhunga zirna in te state dang el phak tura ṭan la tura fuiha vil tlat turin YMA hian hma an a thei ngei ang. Zirna uar kum puan a ni tur hi a lawmawm a, he kum puan bawhzui kawngah Mizo mipuite i ṭang rual ang u.