MYC hmalak tum dan

Mizoram Youth Commission (MYC) chairman chuan tun hnai khan New Delhi-ah Naukri.com hotute a kâwm a; Mizoram ṭhalaite tana innghahna tling portal rintlak siamna turin MYC leh Naukri inthlun zawm dan tur an sawi dun. 

Naukri.com hi hna zawngtute tana website ṭha tak a ni a, he mi kal tlang hian mi ṭhahnem takin hna an hmuh tawh bakah thil tam tak an zir belh phah. Mizoramah ṭhalai hna hmu lo leh hna zawng mek ṭhahnem tak an awm mek a, heng zinga mi ṭhenkhat hi chu hrilhtu leh kawhhmuhtu nei mang lo an ni a, kawhhmuhtu an mamawh hle a ni. 

India ram hmar chhak kil aṭang hian internet kal tlangin engkim kan ban phakah a awm ve tawh a, tunah chuan thingtlang khaw kilkhawr deuhah pawh internet a thleng ve deuh zel tawh. Hei vang hian Mizo ṭhalaite hian kan awm hmun aṭangin internet-a hna zawnna hi kan hmuh phakah a awm a ni tih hre thar ila, kan hna zawnna mual pawh kan zauh a ṭha khawp mai. 

MYC-in India ṭhalaite el phak tur leh, hna an zawnna bupuia Mizo ṭhalaite an tel ve theih dan tur kawng an kawhhmuh hi thil lawmawm tak a ni. Tunah hian Naukri.com nena indawrna hi eng vang pawhin hlawhtling lo palh pawh ni se, Mizo ṭhalai eng emaw zat chuan Naukri.com an hmelhriat phah dawn bakah hna zawng turin an bih chiang ngei ang tih a rin theih.