Kawngpui ṭha mamawhna a zual

Mizoram Trucks' Owner Association (MTOA) leh Mizo­ram Truck Drivers' Association (MTDA) ten NH-54 Kawnpui - Buichali inkarah tlan harsa khawpa kawng chhia a awm vanga lirthei an tlan tir loh zet hnuah sorkar lamin kawngpui chhe zual laite a thawm ṭha a, lirthei pawh a pang­ngaiin a tlan leh ta. 

MTOA hruaitute chuan, "Tlân theih pangngai a nih chuan tlân kan hreh lo. Tunah chuan a khuar nasa zual lai hnawh a ni tawh a, truck kan dintir hian mipui kan tibuai si a, mipui an zahawm kan tih avangin truck-te kan tlantir leh ta a ni," an ti a; Mizorama kawng pawimawh bera chhal ngamah kawngpui mam ṭha pawh beisei ngam lo a, "A tlan theih chuan," ti ang vel leka beiseina an nei ta hi an lainatawm angreng a, kan ram kawng dinhmun a tilang chiang hle. 

Congress-in sorkarna vawn fung an chelh lai khan mipui thinrim cho chhuak hial khawpin kawng kha a chhia a, kawngpui tam tak kha chu zawh hleihtheih lohin a awm. Tunah MNF lamin sorkarna vawn fung an han chelh ve ta a, anni hi kawngpui siam ṭha vek hmana insawia Assembly House-ah hial lawmthu sawina pu lut kha an ni a, thla tam pawh a vei hmaa zawh ngam loh khawpa chhiaa kawngpui pawimawh lai an hnut­chhiah thei kha a zialo takzet a ni. 

Kan rama lirthei hmanga eizawng pawl, kan nitin ma­mawh phurtute'n 'kawngpui mam ṭha' pawh beisei ngam loa' tlan theih pangngai' chiah an sawi ri ngam hian kan dinhmun a hril thui hle a; sorkar hmasa a ni emaw, tuna sorkar pawh ni se, kan rama kawngpui pawimawh bik pawh enkawl thei lo an nih chuan an hna an tlin lo takzet a, ṭan an lak a ngai hle a ni.