Kan ramri a him lo
Assam Rifles leh Customs official-te chuan tun hnai khan Champhai Zote khaw ram chhungah AK-56 rifle pathum leh magazine ruak pathum an man a, Myanmar pawisa eng emaw zat an man tel. Tun hnaiah vek Assam Rifles leh Exice & Narcotics mite chuan Champhai Tlangsamah ruihhlo meth mun 2,69,000 an man a, tualchhunga an hralhna ang chuan cheng vaibelchhe 6 dawn man a ni.
Mizoram hian Myanmar leh Bangladesh nen ramri thui tak an inṭawm a, heng ramrite hi sorkar laipui lamin a veng tura a ruat bik sipai an awm a, heng ramrite hi a him lo hle tih chu tlâng hriat a ni. Myanmar ramri lam aṭang hian ruihhlo a lo lut reng tih a chiang a, ralthuam, rangkachak leh sorkar phal loh thil dangte pawh a khat tawka man tur a awm reng bawk. Kan ramri hi a him lo hle tih a chiang.
State sorkar tan chuan ramri veng tura sorkar laipui lamin a dahte kawh mai an remchang viau a; nimahsela kan ram leh hnam hmangaih tak taktu tan chuan state police-te chakna hmang pawha ven theih thil tam tak a awm ve ngei ang. Mizote tluka khawtlang tha chakna hman ṭangkai tur nei ṭha hi an vang hle ang a, sorkar hian ramri leh a chhehvela khawtlang hruaitute hi ṭha zawkin thawhpui ngat se ramri aṭanga lo lut thil ṭha lo tam tak hi a ven theih a rinawm.
YMA branch hrang hrangin an khua leh a chhehvel tihtakzeta an ven phawt chuan ruihhlo leh dan loa thil lakluh pawh a vang pharh niin an sawi ṭhin a, chutihlaiin YMA/ VDP/ JAC ang tan hlawh nei loa tlawmngaia duty ve reng theih a ni lo a, sorkar lam hian thawhho dan tur ṭha zawk hi duang thiam se chu khawtlang mipui puihna nen kan ramri hi ṭha zawka ven theih a nih hmel.
Tunah hi chuan sorkar laipuiin veng tura a dahten kan ramri an veng hneh tawk lo a, Mizoram police lamin tih tak takin an veng lo bawk nen, Myanmar lam aṭang hian ruihhlo, ralthuam leh sorkar phal loh thil dang hi a lo lut reng a. An mansak chhun media lama kan lo hmuhin kan phun kan phun ringawt a, a sorkar lamin ramri him lo hi a vei a nih loh chuan heti hian thil ṭha lo luhna kawngpui kan nei kumkhua dawn a ang ta hle.