Zu khap leh dan loa zu zuar

Vairengtea Excise & Narcotics department (END) staff-te chuan Mizoram Liqour Prohibition (MLP) Act hman a nih hnuah sap zu ûm puitling 5,573 an man tawh a, zu kaihhnawihah hian mi 13 an man a, zu kaihhnawiha thubuai an ziah luh zat chu 36 a ni. 

Mizoramah zu khapna dan hman a ni leh ta a, dan anga zu zawrhna tihtawp a ni tawh. Ualau taka phalna neia zu zawrh a tawp ta hi chhungkaw tam tak tan thu lawmawm tak a ni a, mi ṭhenkhat hi chu a langsara zu an zawrh avanga in ve mai te an ni a, zu ber a awm tak lohah chuan in chhunzawm lo eng emaw zat an awm ngei ang. 

Hetihlai hian zu khap bur a nihlai aṭanga in ṭhang tawh, dan anga zawrh a nihlai pawha nghei chuang lo, tuna zu an khap nawn leh tak hnu pawha in lo thei lo hi eng emaw zat an awm ang. Heng mite hian a theihna apiangah zu an zawng a, khawpuiah chuan sap zu (a sen chi kan tih mai) hi man to taka lei tur a awm reng avangin pawisa tam tak sengin zu an lei ṭhin. Tualchhunga zu (local kan tih mai) siam chawp pawh man sang zawka lei tur a la awm reng. Zu hi a vang ta ngei mai a; nimahsela a la rêm lo mai ni loin a chang chuan khawpui daia zu zawrhna area-ah hnawksak khawpa tam lirthei a la ding ṭhin. 

Zu khap hi mi tam zawkin ṭha an ti a, chutihlai chuan zu khap inti sia man to zawka lei tur a awm reng dawn chuan khap ting tang loh an duh thu pawh an lo sawi tawh ṭhin. Tunah hian Aizawl khawpuiah pawisa nei tan zu lei tur a la awm reng a, khawpui chhehvela zu zawrhna hmunpui ṭhinahte pawh zu lei tur a la awm reng mai hi sorkarin ṭan a lak a ṭul takzet a ni. 

Sorkarin zu a khap a nih chuan dan anga zawrh phal a ni tawh lo mai ni loin, dan loa zawrh te phei chu khauh takin a vilin a vai tur a ni. Tun anga a kal chuan MLTP Act hmanlai ang deuh khan dan anga zu zawrhna titawpin dan loa zu zuarte'n nuamsain zu an zuar leh palh mai ang tih a hlauhawm.