Vanglaini logo

State budget

Kum 2020-21 chhunga Mizoram budget tura ruahman cheng vbc. 10,715 chu Assembly House-ah Finance minister-in a pharh ta a, kum 2019-20 budget cheng vbc. 10,692.30 aiin vbc. 22.7 (0.21%)-in a tam zawk. Budget-ah hian sorkar hnathawk hlawh, pension hlawh, inrelbawlna etc. atana hman tur Revenue Expenditure chu 84.20% a ni. 

Mizoram budget thar hi kum hmasa lam aia a punna a tlem piah lamah kum danga kan pawisa dawn ṭhin aiin kawng tam takah kan dawng tlem zawk dawn. Finance changtu Chief Mi­nister chuan 14th Finance Commission thutlukna avangin budget hlâwk leh duhthusama ṭha a beisei theih loh thu a sawi. 

Thawh chhuah sawi tham kan neih si loh avangin sorkar tan sum hmuhna tur zawn thiam a ngai dawn a, he budget tharah hian state sorkara chhiah tling khawm State Own Tax Revenue (SOTR) 
aṭangin cheng vbc. 661.69 te, chhiah ni lo aṭanga sorkarin sum a hmuh State Own Non Tax Revenue (SONTR) aṭangin vbc. 583.07 leh, sorkar hnathawk leh cooperative society-te'n loan an rulhna Recovery of Loan & Advances aṭanga hmuh vbc. 41.06-te a ni. Hetia thlir thuak chuan sorkar hian khawiah ber emaw hi chuan chhiah a tipung ngei dawn niin a lang a, “Mipui nawlpui nghawng thilah nge chhiah hi an tihpun dawna hmun dangah?” tih hi zawhna chu a ni ang. 

Mizoram budget-a mangan­thlak ber ni ṭhin chu sorkar hnathawk hlawh leh an inenkawl­naa sum kal hnem lutuk hi a ni. He bud­get tharah hian sorkar hnathawk hlawh, pension hlawh leh department in­enkawlna senso tur (Revenue Expen­diture) atan cheng vbc. 9,021.90 ruahman a ni a, chu chu budget pumpui aṭangin 84.20% a tling. Heti a nih chuan hmasawnna atana sum hman tur hi a tlem tham hle tih a lang a, kan budget pumpui aṭanga 15% vel chauh hi. 

Mizoram budget pumpui hi kan thlir chuan ‘mipui chan tur’ han tih mai hi sawi tham a awm lo a, sorkar inrelbawlna lamah kan sum a kal fai deuh vek dawn a nih hmel. Chutihlaiin chhiah (SOTR) aṭangin cheng vbc. 661.69 hmuh chhuah an tum bawk si a, a pawisa chang tlem ber mipui lam hi budget-a pawisa thawhtu atan min hmang dawn a ni palh ang tih a hlauhawm khawp mai.