Sorkar hnathawk zin chhuakte

Mizorama sorkar department hotute hi vawi eng emaw zat ram pawnah thil zir turin an zin chhuak ṭhin a, a chang chuan kan minister-te meuh pawh an zin chhuak ṭhin. Heng zin chhuak zingah hian sawmna dawn avanga zin an awm a, Mizoram sorkar pawisa hmanga zin an awm ṭhin bawk.

Sorkar hnathawk zin chhuakte hian an zin chhuah phu tawk ang hlawkna an hawn nge hawn lo, tih hi sorkar hian a vil zui a pawimawh khawp mai. Tute emaw zin khawthawnna tur hian sorkar sum hi an hmang mai mai ang tih a hlauhawm. Zin chhuakte zin chhuahna leh an thil tihte hi chhui chiang ila, ṭhenkhat hi chu a tel loa awm theih, ram tana hlawkna awm belh tur ni lem lote pawh a awmin a lang. 

Department ṭhenkhat phei hi chu Mizorama kan thlai leh thei neih sate hman ṭangkai kawnga thawhhlawk tak ni lem lo, state dang leh ram pawna thlai leh theite zir chianga zin chhuak fo ṭhin an ni a, henga sum sente hi Mizoram sorkar pawisa a nih chuan ennawn ṭhin a ṭha khawp mai. 

Kan ram hruaitute hian sorkar laipui dawra zin chhuah an intihhmuh hle niin a lang a, ram tana thil ṭha tak an rawn hawn deuh zel niin an zin report-ah chuan a lang a, hei pawh hi a tak a chan hma chu awih chin tawk hriat a harsa. Mizoram sorkar hnathawk state pawn leh ram pawna 'thil zir tura' zin chhuakte hi sorkar hian vil uluk deuh se, an zin chhan leh sorkar sum senso a inbuk tawk nge buk tawk lo, tihte thlenga en nawn ngam a ṭha khawp mai.