Kawngpui tlo lo

MZP sub-headquarters, Tlabung chuan thuchhuah siamin, National Highway no. 302, Tlabung leh Lunglei inkar kawngpui chu siam zawh a nih aṭanga thla ngaah a chhe leh tawh hle tih an tarlang a, a rang lama siam ṭha leh thuai turin PWD an phût. 

Tun hnaia Mizorama kan hriat zing tak chu kawngpui chhiat thu a ni. Kum 2017 leh 2018-a mipui phunna lian ber chu kawng chhe lutuk a ni a, khaw ṭhenkhat phei chu tlawhpawh hleihtheih loh khawp­in kawng a chhia a, a chhiat vanglai phei chuan district ṭhenkhatah motor lian pawh a lut hleithei lo a nih kha.

Sorkar thar kan nei ta a, chu sorkar tharin hmathar a lakna langsar chu kawngpui thawm ṭhat a ni. Hnathawhna tur sum a awm sa a, sorkar hmasa lamin pawisa hman bân an neih nual avangin sorkar tharin ṭangkai takin a hmang zui a, Mizorama kawngpui chhe zuallaite chu an thawm ṭha nghal zung zung a ni. 

Sorkar tih tur chu kawngpui siam a, tui in tur pek a, hriselna lama inenkawlna ṭha ngaihtuah a, mipuite nitin mamawh tur pek a ni a; heng thilte a tih loh hian a tih tur ti lo a ni a, heng thilte a tih avanga han uan chiamna tur a awm lo - state dangah chuan ngaia an neih thil a ni. Mizoram erawh kan dinhmun a lo hniam hman em avangin sorkar thar chuan sorkar hmasa pawisa hman bâng hmanga a kawngpui thawm ṭhatte chu a uanpui chiam a ni ber a, kawngpui zawng zawng siam ṭhat an nih thute an aupui mai bakah Assembly House-ah hian lawm­thu sawinate an nei hman. 

Kum khat pawh sorkarna vawnfung an chelh hmain kawng­pui chhia bawkin a rawn ûm ve leh ta a, hman ni lawka uang taka an kawng siam thu an sawilaiin kawngpui chhia avangin truck an ding a, tunah MZP lam an au chhuak leh ta. 

Engpawhnise kan ram sik leh sa, ruah tlak dan, a chheng chhiat dante thlir hian state dang kawngpuite nena khaikhin theih a ni kher lo thei a; nimahsela heti tak maia kan kawngpui tlo loh chhan te, siam leh thawm ṭhat loha hnutchhiah a nih chhante hi chhui chhuah a, a mawhphurtute chunga dan anga thil kalpui hi a hun tawh ngawt mai.