Assam-in min zuam ta hle

Bairabi Zophai hmuna Mo­solman-te'n mosque  (biak-in) an sak chu sorkar thuneitute'n an bawhzui vanga hun eng emaw chen an chawlhsan hnuah, tun hnai aṭang khan an sak zawm leh ta.

Helai hmuna mosque sak hi ramri ngaihtuahtu Core Committee chuan ṭha ti loin Core Committee thupek  bawhzuiin September 10, 2019 khan  Mosolman biak-in satu Kachurchol Masjid Committee hnenah Kolasib DFO hmingin mosque sa chhunzawm lo tura hriattirna pek a ni tawh a, hemi hnu hian an hna pawh hi an chawlhsan a;  nimahsela tun hnaiah an thar thawh leh ta a ni.

He thil hian ramri chung­changah Assam-in Mizoram hi a zuam hle tih a nemnghet tiin a sawi theih a, kan ram chhung ngeiah Assam lamin kut an thlak leh ta a ni. Vairengte lamah a ni emaw, Bairabi lamah pawh ni se Assam lam hi min nektu an ni zel a, chutihlaiin a tuartu leh a ram chân zawk chu Mizoram lam kan ni zel.

Kan chief minister zahawm tak chuan ramri buai chinfel dan hi a hria tih a sawi tawh a, a thil hriat hi a taka lantir a hun ta khawp mai. Assam hi BJP rorelna state a ni a, anni hi NEDA hnuaia MNF nena thawkho vek an ni a, kan chief minister tan hian NEDA leh NDA hnuaia an thawhpui chief minister ve bawk biak hi thil harsa a nih hmel lo a, political level-a inbiakna neih a hun ta hle.

Ramri kan sawi apiangin, "Hmanah pawh..." tih hi kan sawi duh dan a ni a, tunah hian hman sawi a hun tawh lo a, hmana an lo luh ngam ngai lohna hmunah Assam lamin kut an rawn thlak zel a, min zuam tawlh tawlh a, keini lam chu rem hre takin kan la ngawi a ang ta ber. Ramri chungchangah Assam hian tun hma zawng aiin min zuam chho zel ang tih a hlauhawm ta ngawt mai.