Mi hausate cho chhuaktu ni thei se

M Lalmanzuala, IAS (Rtd.) chuan zirlai, chhungkaw dinhmun harsate ṭanpuitu tur leh ṭhangtharte zinga mi hmantlak chherchhuaktu turin Michael Lalmanzuala Foundation (MLF) an din thu tun hnai khan a puang a; MLF tan hian cheng nuai 10 a pe a, zirlai ṭanpui ngaite leh puihtlak nia ngaihte an pui ṭhin dawn a ni. 

Mizo officer liante zinga mi, Mizoram chief secretary hlui ni bawkin Mizoram dinhmun hre chiang taka zirlai harsa zawkte puihna tur a ruahman hi a entawn­tlak a, hetianga tih nachang a hria hi a lawmawm takzet a ni. State dangte ang em chu la ni lo mah ila Mizoramah mihausa leh rethei inkar a zau tial tial niin a ngaih theih a, hausate an hausak belh zel avangin mirethei leh bet laklawhte nen chuan an khawvel hi a inthlau tawh hle. Khawvel hmun danga mi hausate khawsakna ang maia khawsa theite kan neih tawh laiin kan rama mi harsatte tan chuan nitin ei bar zawn ringawt pawh a la harsa takzet a ni. 

Mizoramah mi hausa tak tak an awm nual tawh a, mi ṭhenkhat chu midangte tana luan chhuah hreh lo, mah se a ngaihna hre lo ve tak takte pawh an ni thei ang. Midangte ṭanpui duh tan pawh a sum hlawma tute emaw hnena pe chhuak ringawt lo a, a kawng hmang fel taka awmze neia midangte puih dan siam thiam hi a finthlak hle. 

Mizoram a vei thu a thuziak hmanga lantir mai duhtawk loa a sum neihte pe phala M Lalmanzuala a pen chhuak hi a entawntlak takzet a; hetianga mi harsate dinhmun hrethiam a, zirlai harsa zawkte tana remchanna siam an awm hian Mizorama mihausa dangte cho chhuak thei se, mi neinung zawkte hian intih hmuh chho zel se a ṭha khawp mai.