Aizawl bawlhhlawh paih leh politics

Congress Legislature party leader leh an party mi leh sate chuan tun hnai khan Tuiriala bawlhhlawh paihna hmun, Aizawl Solid Waste Management Centre (SWMC) an tlawh a; Aizawl mipuite bawlhhlawh chi lia thliar tura an tihlaiin SWMC-ah chuan bawlhhlawh chi hnih (ṭawih thei leh ṭawih thei lo) chiaha thliar a nih thu an fianfiah niin an sawi. 

CLP leader chuan Aizawl Municipal Corpo­ration (AMC) chu bawlhhlawh paih dana Aizawl mipuite ṭul loa tibuaiah a puh a ni. Aizawl khawpuia bawlhhlawh paih dan hian sawi a hlawh hle mai a, hun rei tak chhung chu chhungkaw tam tak tibuaitu a tling ve reng a ni. Bawlhhlawh thliar danah chi lia thliar tir an ni a, chutihlaia a paihna hmun bera chi hnih chiah an lo thliar leh si a nih chuan thil fel lo tak a ni a, hei hi ṭul loa mipui phurrit belhchhahna a nih theih piah lamah mipui bumna ang hial pawhin a puh theih ang. 

Chutih rualin SWMC hei hi AMC inthlan dawn hnaia tlawh a nih miau avangin a tlawhtu lam pawhin mipui hma ngaia an tih a ni nge, inthlan dawna vote hmuh beiseina avanga ti tih erawh hriatthiam a har. Eng pawh chu ni se an thil hmuh chhuah hi a dik a, mipuiin bawlh­hlawh chi thum chi lia an thliar laia a paihna hmuna bawlhhlawh chi hnih chiaha a lo thliar leh si a nih chuan AMC tan mualphona lian tak a ni thei hial ang.

Tunah chuan eng zawng pawhin sawi thui deuh dawn se politics-a thu inchuh­ah a chang zo tawh dawn a, AMC inthlan a lo hnai bawk nen mipui lam tan pawh thu dik ber hriat harsa khawpa inhnialna a awm leh mai thei. A pawimawh ber erawh chu AMC inthlan­ah hian tu pawh lo tling se bawlhhlawh paih dan hi langtlang leh felfai zawka kalpui a ngai. Tunah hi chuan Aizawl khawpuia chhungkaw tam tak hi kan bawlhhlawh paih dan kalphung hian a la tibuai hle tih chu phat rual a ni lo e.