Duhsak zawng dahna Education department

MNF sorkar hnuah School Education dept. hnuai SSA leh RMSA-ah December, 2018 aṭanga September, 2019 chhungin advertisement chhuah loin thawktu mi 91 lak an nih tawh thu Mizoram Pradesh Congress Committee (MPCC) hnuaia Media departmet chuan an tarlang a, "Heng zinga 36 chu SSA hnuaia lak an ni a, 55 chu RMSA hnuaia lak an ni. Thawk­tu lak tam zawk hi Education minister Lalchhandama Ralte-in a mi duhsak zawngte a thun an ni," an ti. 

RTI Act hmanga zawhna chhannaah zirtirtu lak dan hi chiang taka hai chhuah a ni a, MNF-in sorkarna vawn fung an chelh hnuah advertisement chhuah loin thawktu tam tham tak lak an ni tawh. He sorkar hian zirna a chhe tawh a, siam ṭhat kan tum ti reng chung siin he thil a kalpui hi a inhmeh lo hle a, zirna siam ṭhat tumtute thiltihah chuan a zialo hle. 

Hna dilna hi chief minister hnena ziak an awm a, School Education minister hnena ziak an awm bawk. Dilnaah Assembly Speaker-in ‘kan iptepui banna an ni a...’ tia a dilpuite an awm a; School Education minister-in, ‘special case’ a tih te, ‘Ani hi ka duhsak tak a ni a,’ a tihte leh, “Ani hi special-a kan ngaih pawimawh a ni,” tihte a inziak a, a zialo hle a ni. 

Tehna dang hmang loa ‘duhsak zawng’ tihte leh ‘spe­cial case’ tihte kan ram hruaitute’n an ziak lang ta hial mai hian hmelhriat zawngte induhsakna uchuak tak kalpui a nihzia a lang a, hetia ‘duhsak bik’ an awm a nih chuan a MNF chhungkua ngeiah pawh duhsak loh an nei tih a chiang a, a zialo hle. Kan ram enkawl tura kan thlan tlin kan ram hruaituten sorkar hnaah pawh School Education department hnuaia ‘duhsak zawng’ an la inthun lui duh zel mai hi a pawi takzet a, CYMA-in zirna uar kum a puante nen phei chuan thil inpersan tak a ni.