Hna laka inpuh tawnna

School Education minister chuan, SSA leh RMSA hnuaia advertisment chhuah loa thawktu an lakte chu Congress sorkar laia an dan siam hmanga lak a nih thu a sawi a, SSA Executive Council-in Feb. 13, 2015-ah hetianga hna lâk phalna hi a lo siam tawh niin a sawi. 

Congress lamin MNF chu an sorkar hnu hun rei lo te chhunga advertisement pawh chhuah loa School Education department hnuaia hnathawktu 91 laah an puh. MNF lam an insawifiah a, "Anni lamin an ti hmasa zawk," ti ang deuhin an chhang ta mai a, a mak hle a ni. Mizorama thil kal dik lote siam ṭha a, 'Pathian leh kan ram tan,' tia thil dik lo siam ṭha tura beiseiten Congress lam an puh let ta hlauh a, hei hian kan ram dinhmun thui tak chu a hril a tih theih ang. 

Advertisement chhuah loa hna lâk a nih dawn chuan 'mi thiam' nihin awmzia a nei ta miah lo tihna a ni a, a dil theih tih pawh miin an hriat loh laia 'dil nachang hria' apiang an vannei a, chutah an dilna lehkhaah Chief Minister, Speaker leh minister-te remtihna/ dilpuina a la inziak zui bawk. Party dang mi leh sa leh neutral tan chuan heng hna 91-te hi dil ve ngaihna awm lo a ni tawh a, MNF-ah pawh hna dil theih a ni tih hre lo tam tak an awm ngei ang. 

Hna ruak hnawh khah loh hi hnawh khat tura tihna advertisement ber an chhuah si loh chuan kan lehkha thiam zawkte tan dil ve theih a ni lo a, sorkar hna beiseia harsa taka lehkha zir tam takte beidawnna tizualtu mai a chang ang tih a hlauhawm hle. Dilna lehkhaa kan ram hruaituten an dilpui dana, "Kan iptepui banna," tih an ziah sak te, "Ka duhsak ber No 1," tih an ziak lang ngamte leh School Education minister ngeiin 'special case' tia a ziakte hian hna lâk dan hi a fel fai tawk lo tih chu a tilang awm e. 

Engpawhnise advertisement chhuah loa hna lâk pawh sawi mawi zel tawh sorkar kan hrawn hi a vanduaithlak a, tuna hna lâk an kalpui dan hi chu ṭhalai lehkha thiamte aiin duhsak zawng inthunna mai niin a lang.