Diknain rorel se

Aizawla Vigilance Awareness Week hmannaa khuallian chief minister chuan, diknain ro a rèl theihna atan sorkarin theihtawp a chhuah thu a sawi. Chief minister chuan, Vigilance Awareness Week chu hlemhlêtna leh eirûkna laka fihlim theihna tura hmalak tharna tur a nih thu sawiin, inkhawma telte chu dikna ûm a, thil dik lo leh sual laka fihlim turin a sáwm a, "Corruption leh thil sual dang khawih lo a, mi dangte tana hnawk lo tura fimkhur a pawimawh. Thil dik lo tiduh lote awm khawmnaah chuan nun a zalên hle ṭhin," a ti. 

Vigilance Aware­ness Week hman a nihlai vel hian social media lamah sorkar lehkha a darh nasa a, heng lehkhaahte hian kan CM, kan speaker leh minister-te thuziak a chuang hlawm. Hna dilna lehkhaah an dilpuina an ziak a, an seal an chhu zui bawk a ni. Henga an thu ziakte hi chhiar chuan kan ram hruaitute thil kalpui duh dan hi a mak hle. 

Hna dilna ṭhenkhatah chuan kan ram hruaitu tura kan thlante hian, 'Ka duhsak ber No. 1 a ni,' tiin ṭhalai lehkhathiamte'n an inchuh luih luih sorkar hna pe turin an indilsak hlawm a, 'special case' tihte an ziak lang. Hei bakah hian contractor ni loin contractor hming hawha hna a dilnaah chuan kan chief minister zahawm takin PWD Engi­neer in Chief hnenah, "Tihsak hram dan lo zawnsak ta che u," tiin hming a ziak a, seal a chhut hnan bawk a ni. 

Kan sorkar hian kum khat em pawh ro a la rel ṭan lo a, thil ngaimawh tur hi a awm ta zauh zauh mai a, inthlan dawna mipui beisei ang an ni lo palh tih a hlauhawm khawp mai. Tunah kum li vel ro an la rel dawn a, chief minister sawi ang khian heng hun lo awm turahte hian diknain ro a rel theihna turin sorkarin theihtawp tak meuh a chhuah a ngai chu a nih hi.