Police hnathawh a fakawm

Tun hnaiah Civil Hospital, Lungleia nau piang pakhat chu damdawi-in aṭanga ruk chhuah a ni a, hei hi Lunglei police-te'n chhui zuiin darkar 24 a ral hmain naute hi an hmu let leh a, a rutu pawh an chhui chhuak nghal bawk a ni. 

Mizorama kan hriat ngai zen zen loh thil thlenga Lunglei SP leh a thawhpuite chet dan hi a fakawmin a chhuanawm a, mihring an chhan­chhuak a ni mai lo a, nunau tam tak hlauthawng leh ralṭi taka an awm tur chu an hnathawh hmang hian an thlamuan tel bawk a ni.

Mizoram police-te hian hnathawh chhuanawm tak tak an nei ṭhin a, tun hma deuh phei chuan India rama police ṭha ber ang hiala chhal ngam khawpin an thawk ṭha ṭhin a ni. Tunah pawh kan police-te hi an la chhuanawm reng a; nimahsela police zingah an police puite hming tichhe tel thei khawpa hnathawk ṭha lo leh thil ṭha loa inhnamhnawih duh an lo awm ṭhin hi a pawi em em a ni. 

Police chhuanawm tak an awm lai hian mipui vantlangin fiamthu thawhna ang lek leka an hman, "chumi post-a awm chu an hausa duh" tia an sawi ṭhinte an awm a; vanduaithlak takin mi fiamthu tidiktuah an ṭang ta emaw tih tura an hlawh aia khawsa sang zui ta maite pawh an awm ṭhin. Police ni si, dik taka hnathawk tura beisei an nihlaia thil dik lo titu zingah an lo tel ve hlauh mai ṭhin hian police dangte hming a tichhe tel fo a, heng mite hi police hotu lam pawhin en zui a ṭha khawp mai. 

Police-te hi midangte ṭanpuitu tur leh thlamuantu tur an ni a, mi mang­ang leh ṭanpui ngaite tlukluhna tur an ni. Chutiang tak tura tlukluhna tlak leh midangte pui tura police-te an la awm zel thei hi a lawmawm. Lunglei thil thlenga naute nu leh pa tan mai ni lo, Mizoram mipui zawng zawng tan pawh belhtlak leh ṭanpuitu police kan la nei a ni tih min hriat chhuahtir a, Lunglei police-te hnathawh hi a fakawm hle.