Chawa intodelh

Agriculture minister chuan Agriculture department officer-te hnenah chawa intodelh chu sorkar tum leh ngaih pawimawh ber a nih thu a sawi a; ṭhalai tam takin kut hnathawh an hreh loh theih nan farm mechanization uar a, khawl thâ hmanga buh leh bâl tam zawk thar chhuak tura hmalak a nih dawn thu a sawi a. State mipui mamawh khawp thar a nih theih nan theihtawp chhuah turin Agriculture officer-te a chah. 

Chawa kan into­delh hma chu state zahawm kan ni thei ngai dawn lo a, mahni ei khawp pawh thar chhuak lo nih reng hi thil zahthlak tak a ni. State lian zawkte siam chhuah ang kan siam chhuak thei lo a, an thil neih ang tam tak kan nei ve phak lo a nih pawhin, Mizorama mi tam zawk kuthnathawka eizawng ni chunga chawa intodelh lo state nih reng hi thil zahthlak a ni. 

Kan sorkar neih tawhte hian Mizoram hi chawa intodelh turin an la kaihruai fuh tawk lo tih chu chhut chian kher pawh ngai loin a lang reng a, kan ram dinhmun en hian a hriat mai. Loneitute dinhmun chawikanna tur ruahmanna hrang hrang hi state sorkar leh sorkar laipui pawhin a nei tawh ṭhin a, kan state dinhmun chu heti tho hi a ni. 

Tunah sorkar thar a piang a, chawa intodelh sawi lan a ni leh ta. Kan Chief Minister ber hian vai buhfai kan ei tawh loh turte hial a lo sawi tawh a, hman ni lawkah chawa intodelh kan tum tur thu a sawi a, tunah Agriculture minister-in a tui hnih ve leh ta bawk. Mizoram hi chawa kan intodelh ngei theihna tura sorkar ke pen hi mipuiten an thlir reng dawn a ni.