Political fitness

School Education minister chuan tun hnaia zirlaite hmaa a thusawinaah, "Tunlai khawvel kalphung tharah political fit­ness a ṭangkai tawh lo, a tak taka fit nih a ngai tawh. Mipui pawhin rilru puthmang kan thlak a ṭul, political fitness 

aṭanga luh tum phêt an awm ṭhin a, hei hi tunlai khawvel system tharah thil theih a ni tawh lo. A thiam chu an tling mai dawn a ni," a ti a; School Education department-in zir­tirtu muster roll-a mi ṭhahnem tak a lak mekah pawh a thiam leh ṭha apiang an tling mai dawn niin a sawi.

School Education minister-in a department chan hnuaia hna ṭhahnem tak lak a nih meklaia hetiang thu a sawi chhuak ngam hi a fakawm a, dik leh fel takin an kalpui dawn niin a rin theih. Minister sawi ang hian tunlai khawvelah engkim langtlang vekin a kal tawh a, a tling lo zawk duhsak a, a tlingte zawk thlauh thlak an nih chuan sawiselna thawm pawh a ring khawp ang.

Tun hnaia Mizorama hna laka sawi hlawh ber chu School Education department hnuaia MR-a zirtirtu lak hi a ni a, hna lak an ṭan hma aṭangin khel a hlawh tawh. MPSC lama pe lo a, DPC pawh ring loa a hranpaa a latu tur din a, dan awm sa MTET pal tlang chiah lak tur tih tidanglama hna lak a nih vangin sawi a hlawh a ni.

Chutihlaiin School Education minis­ter ngei a ṭawng chhuak a, huaisen takin political fitness a awm tawh lo tih a puang a, a thusawi tihdikna hi zirtirtu lak result a chhuah hunah a lan ngei a beiseiawm a, mipuiin an lo thlir reng ang.