Zu khapna ramah zu

Excise & Narcotics department, Mamit-te chuan August 2019 chhung khan rakzu litre 193 an man a;  zu kaihnawihah mi 16 leh zu bilh lai ṭín 90 an man a, zu khapna dan hmangin thubuai 16 an ziak lut. Heroin gram 14 leh ganja gram 555 a kaihhnawihah mi 13 an man bawk a; NDPS Act 1985 hnuaiah thubuai pariat an ziak lut a ni.

Mizoramah zu khapna dan hman a ni leh ta a, sorkarin ṭan a la nasa a, a ram pumah zu a vang ta hle niin a lang. Chutihlaiin zu man khawmtu lam chuan kil tinah zu man tur an la nei reng a, Mizorama district te ber zinga mi mamitah ringawt pawh thla khat chhungin zu leh a kaihhnawihah man tur an la nei ngah hle.

Hei hian chiang taka a lantir chu zu hi a vang ta a,  nimahsela a la bo lo tih erawh kan hre thei. Khawpui lian zualahte phei chuan a sen chi kan tih maite pawh lei tur a la awm reng a, a man erawh a to ta hle a ni. Zu hi vawi lehkhatah a bo dawn lo a, chutihlaiin khap a nih hnua lei tur a la awm reng hi a veiawm lai chu a ni awm e.

Sorkar hian zu a khap a nih chuan tihtakzeta a beih a ngai a, tuna a kalphung angah hi chuan zu hi khap rem a la ni dawn hnai lo a ang hle. Zu leh ruihhlo man tura hlawh neia rawih ngat Excise department mi leh sate zingah pawh zu in ṭhin tam tham tak an la awm a, kan police-te ngei ngei pawh zua fihlim lo an la tam hle a, hei hian zu khap rem tum harsatzia a tilang thei ang.

Zu khap a nih hmasak ṭum khan in tur a awm reng a, lei tur a awm reng bawk a, khatiang mai maia zu khap kha chu a sawt meuh lo. Sorkar thar a piang a, tha thar nen zu khap turin a bei chho mek a, tuna aia rim zawka thawh a, na zawka a beih a la ngai dawn hle a ni.