Sorkar sum leh sorkar hnathawk hlawh
Mizoram sorkar chuan a hnuaia hnathawkte January thla hlawh chu a rualin a pe chhuak dawn lo a, nikum lama a kalpui tawh danin group C leh group D-te hlawh a pe chhuak phawt ang a, chumi hnuah group A leh group B-te hlawh a pe chhuak leh ang. Hei hi sorkar sum vawi leh khata chhuak tam lutuk tur venna a ni a, group A leh group B-te hlawh tur hi February 10 velah an pek chhuah hman beisei a ni.
Kan sorkar pawisa che vel hi mipui nawlpui tan chuan hriatthiam harsa tak a ni a, thil hrethiam phak chin tan erawh chuan sum leh pai dinhmun a ṭha lo hle tih chu a hmuh theih awm e. Sorkar hnathawkte'n an thawh hlawh pawh a hun taka an lak theih tawh loh chuan, thil dangah inham puarin hnathawh turte sawi chiam ṭhin mah se, a nihna takah chuan sorkar sum bawmah sum a tam lo tih chu phat rual a ni lo ang.
Hetihlai hian sorkar hi a kâwt ta der a, hmasawnna hna thawhna tur sum a nei ta lo a ni hauh lo a, sorkar sum chet vel danah hian sorkar hnathawkte hlawha pawh pen theih loh, a hmanna tur awm sa hi a hranpain a awm. Thil ṭhenkhata hmasawnna hnathawhna tur pawisa a awm reng lai hian, thil dangah erawh sorkar hi a kâwt ta vek anga lang thei hial khawpin a pachhe thei a, thawh chhuah nei lo state kan nih avangin hei hi thil mak a ni lo.
Covid-19 in khawvel a nghawng a, India ram economy pawh hripui len hma aṭanga tlachhe tawh kha hripui a len zui bawk si avangin a tlachhe zual. Hei vang hian sorkar laipuiin state-te puala pawisa a pek chhuah theih zat a tlahniam a, thawh chhuah nei ve bawk si lo Mizoram ang tan chuan hemi nghawng hi a na lo thei lo.
Mizoram dinhmun hi kan en chuan sorkar hi sumah a buai mek tih a lang reng a, thil ṭhenkhatah pawisa nei ang taka lan tum mah se kan sorkar sum bawmah sum a tam lo a; AMC inthlan a awm dawn tih hre reng chung pawha inthlan dawn thlaah pawh a hun taka sorkar hnathawkte hlawh an pek theih dawn loh avang hian kan sorkar hi sumah a buai tih phat rual a ni lo ang.