Theihna sâng bera hnathawh

School Education minister chuan MNF sorkar chu an theihna sang ber nen hna an thawh dawn thu a sawi a, "Sorkar thar lak luh veleh Chief Minister duh dan angin tih tur kan ti nghal a, kan thutiam kawngah theihna sang ber nen hna thawh kan tum a ni," a ti. 

Sorkar kaihruaitu thar kan nei ta a, sorkar thar a din tuk aṭangin hna an thawk ṭan niin a lang. Mizoten hunpui chawlh kan hmanlai pawhin an chawl ve mang lo emaw tih mai turin ṭan an la a, mipui tana thu lawmawm - zu zawrh tihtawp tuma hmalak, thisen sawngbawlna man lak tihtawp, hlawh tihpun etc - a khat tawkin puan tur an nei deuh reng a, hnathawh tak tak an tum niin a lang. 

Mizorama kan sorkar hrawn tawhte mipuiin an kham khawp lohna ṭhin chu hnathawh an tum lo emaw tih mai tur khawpa an awm ṭhin kha a ni. State khata minister rau rau hnathawh tum tak takte chu an hnathawhah a lang mai ṭhin a, a nawlpuiin budget awm sa sem rual bak an hnathawh hmuh tur hriat mang lohte an awm ṭhin. 

Miin hna a thawh duh a, a tum tak tak a nih chuan a thiamna a sang emaw a hniam emaw lam a ni lo a, mipuiin an hmu mai ṭhin. He sorkar thar lo piang hian tun thleng hi chuan hnathawh a tum a, a chet vel dan pawh sawiselna tur aiin fakna tur lam hlir a la ni. 

Hetihlai hian hna­thawh an duh a nih chuan sorkar hmasa hnuaia hnathawh kallai tihtawp ri­ngawt leh work order chhuak tawh pawh hna bul an ṭan loh chuan tihtawp tumna awmte erawh thil danga an chet dan nen a inhmeh lo a, hnathawh duh sorkar chuan midang hnathawk turte dang tel kher lo se a ṭha ang. 

Sorkar thar a piang a, an theihna sang bera hnathawh an tum thu an sawi ngam hi a lawm­awm a, an theihna sang ber hi mi­puiin an thlir rân dawn a ni.