Dan loa zu zawrh

Mizoram sorkarin Decem­ber 21, 2018 aṭanga dry day a puan hnuah Mizoramah sap zu lei tur a váng a, rakzu erawh lei tur a awm reng thung. Assam-a hralh tura siam sap zu Mizoramah lei tur a awm tawh a, Vairengte thlang, Lailapur-a wine shop-te pawh an inchhêk muk ṭan a, a man pangngai aia sangin Mizote hnenah zu an hralh mek. 

Mizoram sor­karin a intiam ang ngeiin phalna neia zu zawrh a titawp dawn niin a lang a, tunlaiin dry day a puang mek. Hei vang hian Mizoramah phalna neia zu zawrh lei tur a awm tawh lo a, dan loa zu zawrh ruk erawh lei tur a awm reng a, a man a to thung. 

Dan loa zu zawrh hi MLTP Act hman a nihlai pawh khan a awm reng tho a, tihtawp tumin sorkarin ṭan la mah se a hlawhtling lo a, a hlawhchham a ni ber. Tunah hnathawh tum tak mai sorkar thar a piang ta a, a hna hmasa ber pakhat chu sorkar hnuaia zu zawrh tihtawp a ni a, chumi hnuah dry day puangin zu hralh thei loin a siam zui bawk.

Sorkar hian dry day puan mai hi a duhtawk tur a ni lo a, khaw hrang hranga awlsam taka dan loa zu zawrh hi a titawp tel ngei tur a ni. Hei mai bakah hian state pawn aṭanga zu lakluh hi a titawp tur a ni a, Mizoram pawisa hi dan loa zu zuarte kutah leh state pawn zu zuarte kuta a luan ral mai lohna turin sorkar hian a tih tur hi ti rawh se.