Lungrual taka CAB 2016 dodal

Mizoram aṭanga Rajya Sabha MP Ronald Sapa Tlau chuan, The Citizenship (Amendment) Bill, 2016 chu Mizoram tan a hlauhawm avangin political party bik sawi loa lungrual taka dodal a ngaih thu a sawi. Bill hi Par­liament-ah pass ni ta se, Indian Con­stitution-a Article 371G-in a dang thei lo niin a sawi bawk. 

Politics-ah chuan ngaihdan inan loh chang a awm ṭhin a, kan duhzawng leh kan duh loh zawngte a dang ṭhin. Ram hruaitu nih tum ṭheuh ṭheuhte pawh an ram hruai duh dan a inan loh avangin an inhnial chang a awm a, an inbeih chang a awm. 

Chutihlaiin 'hnam' tana thil pawi thei a nih tawh hi chuan politics-a kan hawi lam hi dah ṭha ila, ram tana ṭan rual a ṭul hun hi a awm ṭhin.

Tun hnaia Lok Sabha lama an pass tak The Citizenship (Amendment) Bill, 2016 hi Mizoram tana him lo a ni tih hi kan pawm tlang tawh a, political party lam sawi loa kan zavaia ṭanghoa  beih a ngai takzet a ni. Hmar chhak huap zirlai pawlin bandh an huaihawtah khan kan tawp mai tur a ni lo a, Mizoram tan theihtawp chhuaha kan beih tlan a hun ta khawp mai. 

Political party pakhat hmalakna a nih chuan midang tan thlawp a harsa deuh mai thei a, chuvangin ram pum huap pawl lian kan neihte hian ke rawn pen chhuak se, The Citizenship (Amendment) Bill, 2016 kan duh lohna hi India ram hriat tura inthuruala kan duh lohna kan lantir hi a hun hle a ni.