Political party inpuhna thu kal zel

Mizoram Pradesh Youth Congress Committee (MPYCC) chuan thuchhuah siamin, Saitual leh Hnahthial khaw khelmuala phûl lem phah turin Congress sorkar kal ta hun laiin North Eastern Council (NEC) aṭangin sum sanction hmuh a ni tawh tih an tarlang a; hemi chungchangah hian Sports minister chu a thawh ni lo lârpui tumah an puh. Khawzawl khelmual atan Congress hun­laiin UDPA depart­ment hnuaiah pawisa dah a ni tawh a, chu chu tuna UDPA minister bialah a hmalaknain dah a ni dawn a, a thawh ni loa hmingṭhat lak tumah Congress ṭhalaite chuan Sports minister an puh.

Hemi hma hian Sports minister chuan Hnahthial, Saitual leh Khawzawla khelmual siam dan tur chungchang hi Hnam Runah a lo sawi tawh a, Khawzawl khelmual siamna tura Congress hunlaia central sorkarin sum a pe anga sawi chu thu dik lo a nih thu a sawi. Saitual leh Hnahthiala khelmual siam mekte chu tihtawp lailawk a nih hnuah MNF sorkar hnuah theihtawp chhuaha an nawr thu leh, siam chhunzawm thuai a nih tur thu a sawi ve thung.

Engpawhnise Mizoram political party langsar tak pahnihte thu inchuh hi, a thawha thawh lam aiin a hming ṭhatna teltu nih lam a ang ber a, a vanduaithlak hle a ni. Kan Sports minister zahawm tak hian a thawh ni miah loah hmingṭhat lak a lo tum a nih chuan a mawi lo hle a, Mizo leh Kristian tiha mawi lo a ni ang. Chutihlaiin Congress lam hian kan Sports minister hmalakna liau liau, Congress hunlaia an tih tawh kal zel anga an lo sawi nêp a nih chuan a dik lo a, a demawm hle thung ang.

Mipuiin thudik hriat an duh ṭhin laiin politics-ah chuan thu inchuh a awmin dawt leh thudik hriat hran a harsa tawh ṭhin. Political party-te inpuhna hi chu a la awm zel dawn a, mipuiin thil awm dan kan chik a, a dik leh dik lo thliar thiam kan zir hi kan ram kal zel atan a pawimawh takzet a ni.