Sorkar leh mau

Mizoram chief minister chuan, bamboo project-ah sorkarin mau/rua chi buaipui chiam an tum loh thu tun hnai khan sawiin, "Ka sawi chian duh chu, kuhva, sangha chi leh thil dang dangah sorkarin a chî kûi emaw, a chi siam lamah hma kan la ngai lo ang bawk hian, sorkarin kha lam kha (mau/rua chi) buaipui chiam kan tum lo," a ti a; mau leh raw ṭiak chu a rate âwm tâwk siamin, phun nun theih âwm tâwk an nih hunah mimal kut aṭangin sorkarin a lei mai tur thu a sawi.

Chief minister-in mau kalpui dan tur a sawi chiang chho zel a, tunah chuan mau leh raw ṭiak chu mimalin an supply dawn tih a hriat ta. CM sawi ang hian thil dangah pawh a chi supply hi sorkar-in a kalpui ngai meuh lo a, mau leh rua pawh hi a chi chu mimal kut aṭangin an lei dawn niin a lang a, thil kalphung tur zawi zawiin a lang chho zel.

Mizoram sorkar flagship programme a nih avang hian ziakin fel takin thil hi awm sa se, mipuite pawhin an chhiar theih turin langtlang taka thil kalpui ni se a ṭhat hmel. Mau leh raw chi lakluh dan tur, a supply dan tur kalphungte hi chu flagship programme-ah meuh hi chuan tun aia chiang zawka hriat hi a ṭha a, sorkar thuneitute thusawi aṭanga chân chhuah ngai lo ni thei se a ṭha khawp mai.

Mipui zawhna tur chu, “Tute nge mau leh raw chi chu supply ta ang?” tih a ni lo thei lo. Sorkar pawisa hi mipui pawisa a ni a, sorkar programme hi political party programme ni loin mipui programme a nih miau avangin sorkar-in mau a kalpui dan hi chiang taka hriat an duh zel ang.