Kohhranin ṭan an lak a ngai

Health minister  leh Mizo­ram Synod hruaitute chuan tun hnai khan Health Minister pisaah HIV/AIDS darhzel tur dona kawnga hmalak dan tur an sawiho. Health minister chuan, koh­hran chu platform nei ṭha ber an nih avangin HIV/AIDS dona kawngah an pawimawh thu a sawi a, "HIV/AIDS hi rilru hian a vei lo thei lo. Kan dinhmun a chhe viau tawh a, hei hi kohhranah kan inzirtir a ngai a ni," a ti.

Mizoram State AIDS Control So­ciety (MSACS) hotute sawi danin  Mizoramah HIV hrik pai mi 19,631 hmuhchhuah an ni tawh a, kum 2018-19 chhung khan chawh rualin Mizoramah HIV kai hmuh chhuah thar ni tin mi pakua aia tam an awm ang a ni a, chu'ng zingah chuan ruihhlo ngai leh nawhchizuar aiin mipui mimir an tam zawk a ni.

Tun hma deuh chuan HIV/AIDS hi kan ral thlir a, mi sual deuhte kai turah kan dah mai ṭhin. Tunah erawh chuan mipui mimir a kangkai tawh tih a taka finfiah chhoh mek a ni a, kan ram dinhmun hi a chhe ta hle a ni. He dinhmun chhe tak aṭanga tho chhuak a, HIV/AIDS dona kawnga ke pen tak tak tur chuan ṭan rual a ngai a ni.

Mizoramah hian kohhranin zah a kaiin thil a ti thei hle mai a, kohhran hawi zawng hi mipui nawlpui hawi zawng a ni thei deuh zel. Kan ram dinhmun a ṭha loh em avangin HIV/AIDS do kawngah kohhran a ngawi mai mai thiang tawh lo a, thapui thawha a beih chuan awmzia a la nei thei ngei ang tih a rin theih.

Kan rama koh­hran hrang hrang hruaitute hi HIV/AIDS do kawngah ṭang rual se, tun aia nasa zawkin ṭan la se, he kan ram min rûna Mizo mipuite min suat mektu HIV/AIDS do tur hian kohhran hian thapui a thawh a hun ta.