NGDRS-in kan ram buai chingfel thei se

Directorate of Stamps & Registration Govt. of Mizoram buatsaih, online a lehkha pawi­mawh  registration tihna, Na­tional Generic Document Registration System (NGDRS) chu tun hnai khan Mizoram deputy Chief Minister-in Mizorama hman theih turin hawng a, NGDRS kal tlang hian in hmun lei leh hralh pawh online hmanga kalpui theih a ni tawh ang.

Mizorama kan buaina lian tak pakhat chu kan in hmun ram lei leh hralh dan kalphung fel hleithei lo hi a ni. Sorkarin ruahmanna hrang hrang siam ṭhin mah se, kan kalphung ber a fel tawh loh avangin buaina sut kian theih a ni meuh lo. Tunah hian Mizoramah in hmun leh ram inneih thuah leh buai a tam hle a ni.

NGDRS hnuaia ram lei leh hralh kalpui tur hian harsatna tam tak a la awm ngei dawn a, chutih rualin kan kalpui thei tak tak a nih ngai chuan tuna kan buaina tam tak hi chinfel theih a nih hmel. Ram inneih thuah, document lem, LSC fel lo hralh chhuah leh harsatna dangte hi awlsam takin a chingfel thei ang.

Mizorama kan land record fel lo hi sorkar hnathawk ṭhen­khatten sum siamna rem­changah an lo hmang ve mek bawk a, ram pek, teh fel, a lei leh hralh a buaipuitute zingah mahni hlawh phu loa hausa an awm theih ṭhin chhante pawh hi a kalphung fuh tawk loh vangah a puh theih awm e.

Tunah chuan NGDRS hman a ni dawn a, a tirah ram puma hman theih la ni lo mah se, hei hian zawi zawiin kan ram lei leh hralha buaina hi a chinfel theih a beiseiawm a; thiam taka kalpui thei turin hnathawktu lam erawh rim taka an inzir chhoh zel a ṭul dawn a nih hmel.