Kan lo neih dan leh kangmei

February 8-13 chhung hian Mizoramah Fire Prevention Week hman a ni dawn a, thupuiah 'Kangmei tichhuak lo turin mi tin i fimkhur ang u," tih a ni a, tun hnai khan district hrang hrangah kangmei ven dan tur sawihona hun an hmang. 

Mizoram hi India rama ram tikang tamna state kan ni a, hei hi kan lo neih danin a zir loh vang a ni. Thingtlang lo neih kan kalpui dan hi pi leh pute hunlai aṭangin a la danglam lo a ni ber a, Agriculture department, Horti­culture department leh sorkar depart­ment dangin ṭan han la viau mah se tlang ram lo neih thlaktu tur hi kan la hmu chhuak thei si lo a, kum tin mai kan ram thing leh maute hi kan hal ral zel a la ṭul a ni. 

Hemi kawngah hian thing­tlang mite hi dem ngawt theih an ni lo a, ei an zawn ve a ngai a, an eizawn thiam dan ber chu tlang ram lo neih a ni a, chu chuan lo vah leh hal hi a keng tel tlat a ni. Sorkarin eizawnna hlawk leh ṭha zawk kawhhmuh tumin sum tam tak a seng tawh a, sum chang thlai hrang hrang lalutin a chin dan turte leh a hralh dan thlengin duang ṭhin bawk mah se, a ram pum huapa eizawnna thlakna tur khawp a la hmu chhuak lo.

Ngaihtuah ngun ngai tak erawh chu khawvel­ah tlang ram tam tak a awm a, lo vata lo hal zel chi erawh an tam lem lo. Tun thlenga lo hal loa eizawng thei loa kan la awm reng mai hi sorkar tan chona ni rawh se. Mipui nuai 10 zingah sorkar hnathawk leh lo neia eizawng kher lo ṭhahnem tak an awm a, a bak chhungkaw tam lo takte eizawn dan tur ṭha zawk siamsak thei sorkar kan la nei fuh lo hi a pawi hle. 

Kangmei ven hapta nen ṭan khawh viau mah ila ram kang laka inven hi thil harsa tak a ni a, chuti chung chung chuan kangmei tichhuak lo thei ang bera lo hal kan zir a, taima taka meilam kan siam a ṭul a ni.