ILP chungchang

MZP General Headquarters hruaitute chuan tun hnai khan Home minister an kawm a, Inner Line Permit (ILP), Mizoram ramri leh Sairang thlenga rél lo luh huna Mizote himna tura lo inven chungchangte an sawipui. MZP hruaitute chuan, ILP chungchangah, a enkawltu leh khawihtu atana ruatte inthlahdah ṭhin vang leh fimkhur tâwk loh vangin Mizoram mipuite'n kawng tam takah harsatna an tawh ṭhin thu an sawi a; ILP chu kalphung felfai zawka kalpui an duh. 

Home minister hian ILP kalpui dana fuh tawk lote ennawn a tum thu a sawi hi thil lawmawm tak a ni a, chak taka bawhzui ngei a ṭha ang. ILP hi a pek chhuah danah a fel lo tawh a, a umzui dan pawh a duh tawk lo a, ILP nei lo thlenga Mizorama an lut thei reng mai hi chu ennawn a ngai hle reng a ni. 

Mizorama lo lut tur hnam dangten awlsam taka ILP an hmuh theih dan, a dilna hmuna thawktu ṭhenkhatin thil fel lo taka an kalpui ṭhin dan, a sponsor-tu lamin an bawhzui loh ṭhin dante hi tun ang mai maia hnutchhiah chi hi chu a ni tawh lo. 

ILP hi khúa reia kan ram leh hnam himna khawih thei a ni a, tuna kan ngaih pawimawh loh dan en hi chuan kan vei tak tak lo a ang hle. Sorkar thar a lo piang a, anni tal hian ILP chungchang hi an vei thar a pawimawh khawp mai. 

ILP hi kan state himna thui taka kengtu a ni a, a pawimawh ang aiin a kalpui danah ngaih pawimawh a hlawh ngai lo. ILP-a inthlahdah a pawizia hi kan la hre chho dâwn chauh a, a pawi zual zel hmaa inven a, insiam ṭhat hi a ṭul hle. 

Home minister thar hian ngaih pawimawh tur tam tak a neih zingah ILP kalpui dan hi dah tel ngei se, hnathawkte inthlahdah vang leh kalphung fel lo vanga kan ramin a tawrh theih dan hre chung hian, ram himna a ni tih hriain ṭan la thar rawh se.