State pawn MP-te rawn inrawlh hi

India ram state pathuma Member of Parliament 11-te chuan Mizoram chief minister hnenah Mizorama lo kir tur Bru-te chu hmun khata chen khawmtir turin an ngen. 

October 1, 2019 aṭangin Bru hruai kir hna thawh ṭan tur a ni a, hun rei tak chhung inbuat­saihna kalpui a ni tawh. Ruahmanna awm saah chuan anmahni duh thu ngeia Tripura lama chhuk tate hi hmun hrang hranga dah tur an ni a, hmun khata awm khawm hi thui tak thlirin a him ber lo. 

Tunah Mizoram MP-te pawh ni lo, state dang MP-in Bru lo kir tumte awmna tur chungchanga thu an rawn nei hi kan state leh a chhunga cheng Mizote min zahlohna lian tak niin a ngaih theih. Kan state chhung buaina chingfel turin keimahni kan ṭha tawk a, keimahni kutah a awm mai tur a ni. 

Tuna Bru chungchanga kan chief minister hnena ngenna lehkha ziaktute hi Madhya Pradesh MP pakua, Delhi leh Maharashtra MP pakhat ve ve an ni. State dang chhunga thil thlengah Mizoram MP-in thu a nei ngai lo ang bawkin state dang MP-ten Mizorama Bru lo kir tumte awmna turah hian sawi tur an nei lo ang. 

Kan state pawhin kan ram leh hnam aiawh MP kan nei a, anni pawhin a MP puite hi ziakin emaw, ṭawngka tal pawhin be pawp se, Mizoram chhung thil chingfel tura rawtna an lo nei ve ngawt hi an tih tur pawn lam a ni tih a hrilh ngam a ṭha. Kan MP constituency chhunga thil thlenga an lo inrawlh ve hi Mizoram MP tan pawh a tlawm thlak thei hial ang. 

Mizoram chhunga inrel­bawlnaah state dang MP-te thu rawn emaw, an puihna emaw kan mamawh lo a, Bru lo kir tumte awmna tur chungchanga thu rawn neih tum state dang MP 11-te hian an kuang lo an nawr a ni. Mizo mipuiten hei hi ngawih bopui mai lo ang u.