YMA leh sumdawngte thawhhona

Serchhip Sub. Hqrs. YMA chuan  tun hnai khan Serchhipa sumdawng liante kokhawmin ram leh hnam humhalhna kawnga sumdawngte pawimawhna an sawipui bakah thawhho dan tur an sawiho. 

Serchhip-a YMA leh sum­dawngte inkawm khawmnaah hian hnam dangin Mizorama sumdawn theihna dan an neih loh thu sawi lan a ni a, hnam dang ṭhenkhatin Mizo nupuia an neih avanga Mizorama sumdawng theia an inngai chu a dik loh thu leh, ILP sponsor chungchanga fim­khur a ṭul thute pawh sawi lan a ni. YMA hmalakna hi sumdawngte chuan an thlawpin lawmawm an ti hle a ni. 

Mizorama sumdawnna tam tak hi chu hnam dang ta a ni. Sumdawnna langsar ṭhenkhatte pawh hi a neitu dik tak hnam dang lo ni lawi site pawh a awm a, Mizo dawr anga lang ṭhenkhat hi hnam dang ta a ni bawk. Hei hi  kan ngaimawh lo a, tun anga kan kal zel a nih chuan kan state ṭhenawmte harsat­na tawh hi kan la tawk ve thei tih kan inhriat a ṭha khawp mai.

Cachar hi tun hma chuan Kachari-te chenna ṭhin a ni a, tunah chuan an khawpui Silchar chu Bengali leh vai kan tih mai hnam dangte khawpui ang mai a ni tawh. Tripura-ah hian tun hma chuan Tripuri hnamte an cheng deuh ber ṭhin a, tunah chuan an khawpui Agartala chu Bengali lalna ram a ni a, an state hruaitute pawh Bengali an ni deuh vek tawh. Meghalaya khawpui Shillong-a sumdawnna hmun lian tam tak chu hnam dang kutah a lut ṭeuh tawh bawk. 

Mizoramah pawh zawi zawiin hnam dang an lo lut zel a, langsar si loin thiam takin bul an ṭan a, kan sumdawnna inbun nghet tawh ṭhenkhat hi hnam dang ta a ni. Hengte hi Central YMA hian ngaimawh se, thapui thawhin dan loa hnam dang sumdawng dap chhuah hna hi kalpui chi a ni ang.