Sipai ûm chhuah leh inthlan campaign

Chief minister Zoramthanga chuan Aizawl khawpuia Assam Rifles-te chu kumin February thla chhunga insawn tura an nawr thu a sawi a, "Aizawl mai ni lo Mizoram hmun danga kan ram min chhuhtu sipaite pawh um chhuah vek kan tum," tiin a sawi. 

Mizo mipuite'n hnawk kan tih tak mai pakhat chu Aizawl khawpui laili taka sipaiin hmun an nei tlat hi a ni. He hmun aṭanga an chhuah theihna tur hian hun rei tak chhung ruahmanna kalpui a ni tawh a, Zokhawsangah an awmna tur ram pek an ni a, an chenna tur in sak peih a ni tawh a, kawngpui siamsak an nih bakah power supply pawh pek tawh an ni. 

Lammual hmun aṭanga Assam Rifles insawn chhuak tur hi eng vak mahin a dalin a lang tawh lo a, an chhuah theihna tur hian hun rei tak chhung ruahmanna siam a ni tawh. A hranpaa ûm chhuah tur chi niin an lang lo a, an insawnna tur in sak sa vek a ni a, engkim peih deuh vek a ni tawh. Chutiang a nih hnua a hranpaa ûm chhuah ngai an la nih chuan a ûm tumtu lam hi min hlau loin min pawisa lo hle ti pawhin a puh theih hial ang. 

Sorkar laipui mi leh sa sipaite hi state pakhatin duh duha ûm chhuah theih chu ni se India ram khawpui lian danga hmun lailia sipaite hi an ûm chhuak deuh vek tawh ang a; nimahsela thil hi a kawng kal pangngai a awm ṭhin a, an chhuak dawn a nih pawhin an chhuahna tur hmunte pek an ngai a, ruahmnna fel tak siam a ngai. 

Aizawla lailia Assam Rifles-te awmna tur siam fel a ni tawh a, tui, êng leh kawng pawh siam a ni a, an insawn ngei dawn niin a lang ta. February thlaa an insawn hman ta a nih pawhin a ûma ûm chhuah lam ni loin kum tam tak ruahmanna lo awm tawh hmawr bawkna mai a ni dawnin a lang. 

February thlaa Aizawl Muni­cipal Corporation inthlan zawh tawh hnuah pawh an la chhuak lo fo a nih phei chuan kan chief minister ûm hi an hlau vak lo tihna emaw a ni thei dawn a, he ṭawngkam hi AMC inthlan campaign-naa sawi a nih angin inthlan campaign-na hmanrua mai mai a ni palh ang tih hlauhawm tak a ni.