Ramri buai kan veh dan hi

MZP Federal Council tun hnaia inhmukhawm chuan ramri chungchangah chak zawka hmalak an rel a, MZP president chuan Zophaia Mosolman biak in sak mek ṭhiah a nih loha an sa chhunzawm a nih chuan Zofate Chawlhbul sa tura an inrin reng thu a sawi. 

Tun hnaia Assam leh Mizoram inrinaa buaina neuh neuh awm hi kan sawi ngun ta hle a, sorkar leh NGO bakah mi­pui mimir pawhin kan ngaihven tlang niin a lang. Sorkar chuan fing taka rel a, awmze neia dan ang taka kalpui a duh a, a ngaihtuahtu tur bik committee a din bakah anni pawh hi inhmu khawm tawhin an kal zel dan tur an rel tawh a; hemi piah lamah hian Kolasib DC leh Hailakandi DC-te an inbe tawh bawk a ni. 

Ramri buai chungchang hi chinfel a nih dawn chuan sorkar hnathawk te, DC emaw chief secretary meuh pawh hi se an tan tihfel harsa chin a awm ṭhin a, political decision siam a ṭul tawh ṭhin avangin kan state hotu liante hi indawr se a ṭha khawp mai. Tun hnaiah pawh kan chief minister zahawm tak hi Guwahati lamah kalin Assam chief minister-te nen pawh an inhmu a, a sawina hun remchang a nih chiah loh pawhin state tana thil ṭangkai leh ṭulah chuan eng thu emaw tal sawi thei se kan ramri buai hi bawhzui pawh a nuam deuh ang. 

Tuna a lan dan chuan kan ram chhung nia kan pawm chinah Assam lam an lo lan apiangin kan pâwng deuh thûr a, kan ramri nia kan hriat ral aṭangin kan kawk kan kawk a, a chhungah Assam lam mi an cheng ṭhup tawh si. Ramri ngaihven bera lang kan zirlai pawlte ngei pawhin, "Assam lama Mosolman biak in an sak chhunzawm chuan...," tiin thu an dah ta chauh a, hei hian ramri chungchangah hian kan zavaiin kan tawlh zawk zel angin a lantir thei ta hial a ni. 

Engpawhnise ramri buai ching­fel tur hi chuan sorkar hotu lu an chet a ngai a, political level-a chinfel tumna tak tak a awm loh chuan buaina hi a reh dawnin a lang lo.