Bru chungchanga state dang inrawlh

MZP General Headquarters chuan thuchhuah siamin, Mizoram Bru-te chungchanga state dang MP 11 an inrawlh leh Bharat Hitaraksha Abhiyan (BHA)-te hmalakna an duh loh thu an tarlang a, an dodal dawn tih an puang. 

MZP-te hian state dang MP-te'n Bru-te hamṭhatna tura an rawn beihpui chu engti kawng zawng maha an pawm loh thu an puang a, chumi piah lama BHA inti hnam dang 140 vel zet Chief Minister office tuala an pungkhawm thei chu an duh loh thu leh venhimna thlenga a nghawng theia an hriat thute an tarlang a ni.

MP 11-in CM hnenah lehkha an thawn a, kan ram chhunga ro kan relna tura an rawn inrawlh hi an tih loh tawp tur an tih piah lamah, Mizoram, Mizo mipuite leh kan CM leh kan MP te thlengin min zah lo hle a ni. Mizoramin keimahni pualin Lok Sabha leh Rajya Sabha-ah MP kan nei a, hmun danga MP-in an constituency pawn lama thu neih an rawn tum leh kan MP-te pawh be rawn loa an bial chhunga an inrawlh hi ngawih bopui chi a ni hauh lo. 

Chumi piah lama hnam dang 140 rual zet mai kan CM pisa tuala an pungkhawm hi thil mak tak a ni. Hei aia mak zawk mah chu an punkhawm thu hi a hunlaiin khawiah mah puanzar a ni loin mipui nawlpuiin an hre lo a ni. CM tuala thil phût neia pungkhawm chu Mizo tlem te pawh ni se kan hriat ngei tur a nihlai a, hnam dang 140 rual an pungkhawm chunga thuppuitu awm ang maia a thawm a reh hmak mai kha a mak takzet a ni. 

Engpawhnise Bru chung­changa state pawn lam mite rawn inrawlh dan en hian kan state sorkar hi an ngainep a nih loh pawhin an ngai pawimawh lo hle niin a lang a, heng mite leh an chet dan MZP-in an dem ngam hi an tih tur dik tak an ti a, YMA lam pawh an ngawi tur a ni lo a, Mizo mipui zawng zawngin na taka kan dem a ngai.