Inthlan dana lungawi

Congress party (MPCC) Executive Committee chuan kum 2018-a Mizoram Assembly inthlanpui an thlir let a, Mizoram mipuite kutthlakna chu lawm takin Pathian remruata an pawm thu leh inthlanna hmanraw hrang hrang EVM leh inthlana duty-te ah sawisel an neih loh thu an tarlang. 

Mizorama inthlan dan kalphungah duh khawp lohna eng emaw awm ṭhin mah se, India ram hmun dangte nena khaikhin chuan kan inthlanna kalpui dan hi a la felfai ṭha hle. Chutihlaiin khawi khawiah emaw sum hmanga vote lei, lirtheia vote thlak tur phurh khawm, ruaiṭheh leh thil dang hmanga boruak siam tuma kalpuite chu a la awm ngei mai. 

Inthlanna kan neih zawh takah khan mipuiin an duh an thlang tawh a, kum nga chhunga kan ram roreltu tur an thlang fel tawh. Kan duh zawngte leh kan ṭan zawngte an tling lo palh a nih pawhin mipui thutlukna pawm mai hi a hahdam a, puhmawh tur thil dang zawn chiam hi a finthlak lo hle a ni. 

Tun hnaia inthlan ṭhenkhatah political party ṭhenkhatin chak loh an thiam lo a, mipui thutlukna pawm duh loin puhmawh tur dang an zawng a, kan in­thlanna hmanrua EVM-te hian tiching­pen anga an sawi kha chu a  zialo takzet a, a buaipuitu sorkar official-te rinhlelhna thlengin a kawk thei awm e. 

Engpawhnise kum 2018-ah tluang takin inthlanna kan nei thei a, a result-ah lungawi kim theih ni lo mah se inthlanna an kalpui danah erawh kan lungawi tlang niin a lang a, a lawmawm hle.