Governor nghet neih hi kan chanvo

Mizoram Assembly speaker chuan, Mizorama Governor nghet dah turin President Ram Nath Kovind hnenah ngenna a thawn a, tun thlengin a la chhang lo. Hei vang hian Speaker chuan prime minister Narendra Modi hnenah ngenna a thawn leh dawn. 

Mizoram hian Larsap a nei nghet hleithei lo a ni ber mai. Kum 2014-a Vakkom Purusho­thaman a chhuah hnu khan, tuna kan Larsap neih hi a pariatna a ni ta a, kum nga chhunga Larsap pariat nei ang kan ni a, heng zingah hian tuna kan Larsap Jagdish Mukhi tiamin mi pathumte hi state dang aṭanga rawn hmuitu an ni. 

Kan NDA sorkar hrawn mek hian an term hmasa chhung khan Mizoramah hian larsap an dah lutin an sawn chhuak zing hle mai a, tlemlai deuh kha chuan tute emaw an hremna ang maiah an ngai a ang hle. Mizoram hi mipui kan lo tam lo deuh a nih pawhin India sorkar hnuaia state puitling pakhat kan ni a, Larsap nghet neih hi kan phu a, chu chu kan dikna chanvo a ni. 

Kum chanve chhung zet chu Mizoramin Larsap nghet kan nei lo a, state dang aṭangin min rawn hmui mai a ni. Hei vang pawh hi a ni ang, kan Assembly House zahawm takin a pass tawh, 'The Mizoram Maintenance of House­hold Registers Bill, 2019' pawh tun thlengin a la en lo a, hei hi kan House zahawmna pawhin a tuar ang hialin a puh theih ang. 

Sorkar laipui hian Mizoram hi state dangte ang bawkin state puitling, India hnuaia state bung khat a ni tih hi hre nawn se. Larsap nei nghet hleithei loa a dah reng hnua tuna state pawn lam Larsap a hmuitir reng hi a dik lo a, Larsap nghet neih hi Mizoram leh Mizo mipuite chanvo a ni.