BHA hi hriat chian an ngai

Congress party ṭhalai, Mizoram Pradesh Youth Cong­ress Committee (MPYCC)-te chuan Bharat Hitaraksha Abhiyan (BHA) intite'n Chief Minister hnena memorandum an thehluh enfiah tur leh BHA-te nihna hriat chian tumin tun hnai khan Chief Minister's Office (CMO)-ah kal an tum a. Gate-ah police-te'n lo dangin, rei vak lo an innawr hnuah an ṭîn. 

MPYCC president chuan, BHA-te nihna dik tak puangzar turin sorkar an phût thu sawiin, "BHA-te zalen taka lo luta CMO tuala an sapatâl thei hi MNF sorkar hian an hriatpui ngeia tih a nih kan ring. September 6, 2019 khan Hindu kulmûk pawl hi Tripura aṭangin Kanhmun police pal­tlangin Mizoramah an rawn lut a, hei hi Mizoram sorkar hian a hre lo thiang lo. BHA hian Mizoram sorkar hnuaia district magistrate hnenah an kal tur thu hi lehkhain an hrilh hmasa a ni," a ti. 

Politics-a inbeihna leh inpuhna a nih tawh chinah hi chuan mipui mimir tan awih tur chin hriatthiam a har khawp mai a, tute emaw thil phuahchawp mai maite a lo ni palh leh ṭhin. Midangte beng hniam a, mahni lam lansarh tumna politics khawvelah hi chuan awih tur leh awih loh tur hi thlir hran a harsa hle a ni. Tun ṭuma BHA chungchangah hi chuan CMO kawtah hnam dang tam tham tak an pung khawm tih media lamah kan hmu vek a, heng mite hi state pawn lam mi vek niin Bru-te tana au turin CMO hi an pan a ni. 

Hei hi thil hriatthiam harsa tak mai a ni a, kan CMO tuala hnam dang mi 100 rual teh meuh an pung khawm thei hi a dik lo hle. Chumi piah lamah tute nge an nih a, eng ang pawl nge an nih pawh mipuiin kan hre lo a, Bru-te ham-

ṭhatna nawr puitu an ni tih hi kan hriat chin chu a ni mai. 

Sorkar tan pawh BHA-te zalen tana Mizorama an lo lut hrim hrim hi an sawifiah a ṭha a, tu phalna neia lut nge an nih a, eng vanga Mizoram an luh hnuah pawh kan CMO meuh an luh chilh theih, tih hi sorkar hian a chhan a ngai a ni. 

Anmahni duh thu ngeia Mizoram aṭanga chhuak a, vawi tam tak Mizoram leh Mizote dawta min hektu Bru-te thlà rawn hauh tura Mizorama lo lut a, kan hmun pawimawh ber pakhat thleng thlenga kal thei BHA hi tute nge an nih chiah, tih Mizo mipui hnena sawifiah hi sorkar hian a bâ a ni.