CM, Deputy CM leh Sports minister Mizoram Pradesh Congress

Committee (MPCC) Media department chuan tun hnai khan thuthar thehdarhtute an kawm a, Chief Minister leh Sports minister inkarah hnungthak inhiah sak tawnna a awm niin an sawi a, Deputy Chief Minister chu a damloh hlana a department chanah ama hming lang loin thil lian tham tak tak an lo kalpui niin an sawi. 

Political party-te inbeihna leh inpuhna kara thu dik hriat harzia chu mipuite hian kan hre tawh a, an inpuhna zawng zawng hi a dik dawn emaw tihlaiin a leh­lamin an rawn sawifiah leh a, mipui chuan awih tur ber hre loin kan buai ṭhin hle a ni. Tunah MNF kaihhruai sorkar kal danah Congress lamin thu an rawn puang teh daih a, a dik nge dik lo hriat ni lo mah se thil thleng khat tak chu a ni phawt mai. 

Congress lam hian, "Chumi chuan a eiru," ti lamin thu an rawn nei lo a, nimahsela Deputy Chief Minister hi an rawn vuipui a ni deuh ber mai. Tun hnaia social media lama darh ta sorkar lehkha pawimawha a lan dan chuan, UDPA department hnuaia sum ṭhahnem tak awm chu a changtu Deputy Chief Minister hming lang miah loin Sports Minister hian CM hnenah a dil a, CM pawh hian a lo phalsak ve mai niin a lang. 

Heng thil kal vel hian sorkar dan a bawhchhiat loh a, eirukna leh hlemhletna lam a inphum lo a nih chuan pawl dang tana lo helh chiam tur awmin a lang lo a, a helh tur an awm a nih chuan a MNF lam hi ni awm zawk tak an ni ang. Congress lamin Deputy CM an vuipui hi thiam taka MNF chhungkaw kara hem thlak an tumna mai mai a ni thei a, chutih rualin sorkar kalphung pangngai ang lo taka mi department pawisa a changtu minister hming lang loa CM-a lo dil mai hi chu thil thleng khat tak a nih hmel. 

Engpawhnise he thu kal vel hi sorkar chhunga pawisa kal dan turah dan pela chetna a nih loh chuan party dangin lo vei viau tur chi a ni lo mai thei. Ruling party tan erawh chuan kum khat pawh sorkarna vawnfung chelh hmaa neuh neuh awm anga lang hi ngaih­thah ngawt chi chu a nih hmel lo.