AMC inthlang tur leh social media

Aizawl Municipal Corpo­ration (AMC) inthlan chu February 16, 2021 hian neih a ni dawn a, political party hrang hrangte'n campaign ngawrh takin an kalpui mek a; social media-ah AMC campaign lam hawi leh politics-a inbeihna lam hmuh tur a tam hle. 

Social media-in a ken tel chu thudik tawk lo theh darh hi a ni. Tun hmaa media lama hnathawktu bikin media an enkawl ang kha a ni tawh lo a, mi tu pawhin a sawi duh zawng apiang sawi theihna leh puanzar theihna a kawl tawh avangin an thu puan chhuah tur hi thlifimtu an awm ve tawh lo. Hei vang hian thudik tawk lo tam tak a darh a, mi tana pawi thei tur leh ram tana pawi thei hial tur te pawh a lo darh tawh ṭhin a ni. 

AMC enkawltu tur thlan a hnai ta a, he mi kaihhnawihah hian social media lama thu a darh nasa hle. Campaign auhla leh inzawrhna ṭha tak tak hmuh tur a awm a, manifesto puanzar leh sawi zauna bengvarthlak takte leh mahni party sawimawina ngaihnawm tak tak a awm. He mi rual chiah hian thudik tawk lo te, thu phuahchawp leh midang beihna ngialngan tak tak hmuh tur a awm tel bawk. 

Political party tinin social media-ah ṭan an la nasain an party tana ṭha turin ke an pen hlawm a, he mi kawngah hian fimkhur a ṭha hle mai. AMC inthlana vote hmuh tam duh luat avang leh midangin vote hmu tlem se tih luat avanga dawt theh­darh te, midang beihna ṭawngkam chhe tak tak hmante hi tih loh atana ṭha a ni a, tun hi fimkhur hunlai tak a ni ang.

Social media-a thu ziak tur zawng zawng hi thlitfim sen a ni hauh lo ang a; nimahsela political party lama nihna pawimawh nei chin leh a ngaihna hre chin tal hi chu social media-ah hian danglam ngam a pawimawh. Politics thil sawituten duh duh sawi thiang ang maiin social media kan hmang a, hei hian khua reiah nghawng ṭha lo tak a nei ang tih a hlauhawm hle.