Sorkar hmasa hnathawh chhunzawmtu an fakawm
MEDMOC hmalakna hnuaia Mizoram Kailawn - Business Plan Contest & Entrepreneurship Summit 2019 chu tun hnai khan neih chhunzawm a ni a, chief minister-in he hun hi hmanpuiin, sorkarin entrepreneurship chawikân a ngaih pawimawh thu a sawi.
Congress kaihhruai sorkar khan entrepreneur-te leh entrepreneurship lam chawikan tumin ṭha takin bul a ṭan a, Mizorama kan la hriat ngai zen zen loh lamah hmalakna lian tak a nei a, thui tak chu a hlawhtling hle a ni. Tunah MNF kaihhruai sorkar a ding a, 'sorkar hmasa thiltih' tia thlau thla mai loin a hma aia liana kalpui duhna thinlung an pu hi a lawmawm takzet a ni.
Mizorama thil pawi tak thleng tawh ṭhin chu sorkar hmasa hmalakna chhunzawm duh loh hi a ni. Mahni bul ṭan ni lo tihpuitlin duh loh avangin hmasawnna tura hmachhawp lian tak takte pawh a lo hlamzuih tawh ṭhin a, chutah chuan a mawhphurtute pawh chiang takin kan la kawk thei hial awm e.
Khawvelin hma a sawn zel angin kan ram hruaitute rilru put hmang pawh tlem tlemin a danglam chho zel a, political party dangte bul ṭan a nih vanga hnawl vek emaw, tihtawp vek emaw tumna thil ṭhenkhatah chuan a awm ta lo.
Tunlai khawvelin a ngaih pawimawh, kan ramin a mamawh em em chu mahni kea dina eizawnna nghet siam thiam hi a ni a, entrepreneurship lamah chak takin khawvel a intlansiak chho mek. MNF kaihhruai sorkarin Congress hunlaia bul ṭan a nih vanga MEDMOC leh a kaihhnawih thilte hlamchhiah loa a kalpui chhunzawm leh, hmasawn tura a thuam chho zel hi a lawmawm a, an fakawm hle a ni.