A tawpna ni se

Tun hnaia Joint NGO Coor­dination Committee hruaitute ṭhukhawm chuan, Tripura relief camp-a Bru, Mizoram khua leh tui dik tak tih finfiahte chu Mizorama lêt ngei turin an ngen a; tun ṭum bak chu Bru hruai kîr hna thawh a rem tawh dawn lo tih an tarlang. 

Mizoram aṭanga anmahni duh thu ngeia chhuak ta Bru-te hi vawi tam tak Mizorama kir turin ruahmanna siam a ni a, lo kir duh tawk awm ve mah se chhuanlam hrang hrang siamin a nawlpui chu an lo kir duh lo. Tuna Tripura-a an awmna camp hrang hrangah faisa ringin an awm a, ṭanpuina an dawn reng avangin anni tan Mizorama kir hi thil chakawm tak a ni lo niin a lang. 

Hetihlai hian 'raltlan' ang deuha inlantirin sorkar laipui lam pawhin refugee camp an lo buatsaihsak a; nimahsela an tlanchhiat san tak Mizorama NGO pawl hrang hrangte chuan kir turin an sawm reng zawk a ni. Tunah hian an lo kir theihna turin sorkar laipuiin ruahmanna hrang hrang an siam a, state sorkar leh NGO-te nen an indawr reng a, October-a lo kir leh tura tih an ni. 

Tun ṭumah hian an lo kir duh tawh lo a nih chuan Bru-te hruai kir tuma beih hi NGO lam chuan an rem ti tawh dawn lo a, hei hi Mizo mipui zawng zawng kan ṭan rualna tur a ni ang. Tuna an lo haw duh a nih chuan hamṭhatna dawn tur ṭhahnem tak an nei a, an hlauh ber nia an sawi Mizo mipuite'n kir turin an au lawm lawm bawk a, heti chunga an lo kir lo a nih chuan Bru-te koh kir hi Mizote hian kan ba tawh lo a, tun hnuah lo kir an tum hnuhnawh a nih pawhin kan lo do zawk hial tur a ni ang.