Ramri insumdawn tawnna mumal lo

Tun hnaiah Mizoram sorkar chuan Zorkhawthar-ah IR police 60 a dah belh a, he hi Zokhawthar khawtlang mipuite chuan an ngaimawh thu an sawi. Tun hnaiah Zokhawthar kal tlanga Myanmar leh India insumdawn tawnnaah helaia a vengtu tura dah Assam Rifles lamin khauh zawkin thil an kalpui a, sumdawnna kalphung pangngai pawh a buai ta niin media lamah tarlan a ni. 

He buaina inmung nia lang hian sorkar beng a thleng tawh a, District bawrhsap leh SP-te pawhin a ṭul angin hma an la tawh a, chutihlaiin Zokhawthara all NGO leh VC lam ve thung chuan ralthuam famkim nena sipai tirh luh belh chhan tur awma an hriat loh thu leh, thuthang dik lo bawhzuia sorkarin IR police a tirh luh belh chu ṭha an tih loh thu an sawi. 

Zokhawthar kal tlanga in­sumdawn tawnna hi dan ang taka kalpui ni lo mah se kalphung mumal angreng tak neiin an kalpui thung a, Myanmar leh India lamah a tawn tawnin sumdawnna a kal tluan theihna turin ruahmanna siam a ni. Heng ruahmannate hi sorkar dan ang diak diaka siam a ni lo a, sorkar pawmpui ni lem lo lirtheia chhiah lakte pawh kalpui a ni a, bungraw inhlan chhawn dante pawh hi sorkar dan ang thlapa tih a ni lo. 

Chutihlaiin he hmun kal tlanga sumdawnna hi a lian tawlh tawlh a, Myanmar mai ni loin khaw chhak ram dang aṭanga India-a bungraw lo lut tur ṭhahnem tak hi helai hmun kal tlanga lo lut a ni ta. Hetihlai hian Mizoram sorkar hian sumdawnna che vel hi a ral thlir a ang ber a, a chhunga luhchilha chinfel a, dan anga kaltir tumna sawi tur a vang hle. 

A puh chhe zawnga sawi dawn chuan mahnia thuneihna in­siam chawpin chhiah­te an la a, sorkar phal loh angin sumdawnna hi kalpui a ni. A lehlam zawnga thlir chuan kan state-a mipuite ngei pawhin a hlawkna an tel ve theihna turin an thiam angin sumdawnna hi an kaltir a, a sumdawng liante chauh ni loin lirthei neitu, khalhtu, kudam neitute leh bungraw thiartute'n eizawnna berah hmangin chhungkaw tam tak ei bel a ni tawh thung. 

Hetiang hi thil awm dan a nih tak avangin Mizoram sorkar hian a tih theih chinah felfai zawka thil a kalpui ngam a ngai a, sorkar laipui leh helai venghimtu sipaite thuk zawka an inrawlh a, khauh taka thil an rawn kalpui chuan a tuartu chu a mipui mimir hi an ni thei dawn a, fing taka he sumdawnna chevel chinfel hi a hun tawh khawp mai.