Parliament-a zawhna zawh

Zoram Peoples' Movement (ZPM) chuan thuchhuah siamin Mizoram Lok Sabha MP chu tun hnaia parliament session thla thum vel chhung neihah zawhna a zawt ve miah lo chu a chhan sawifiah turin an phut a, India hmar chhak state zingah Mizoram chungchangah chiah zawhna a lut lo niin an sawi. Hei bakah hian Mizoram MP chu BJP lam ṭang NDA leh NEDA hnuaia awm reng sia BJP lama vote pe duh lo anga a insawi avangin bill hrang hranga a vote pek dan sawifiah turin an phut bawk a ni. 

ZPM lamin Mizo­ram MP heti taka insawifiah tura an phut chhan ber nia lang chu Lok Sabha inthlan dawna campaign laia a thusawi ṭhin vang ni berin a lang. Chuti a nih lem loh chuan Mizorama kan MP neih tawhte hi Parliament session-a zawhna zawt lem loa ngawi tluan mai mai an awm fo tawh mai. Congress lam an ni emaw, MNF lam pawh ni se kan MP-te hian zawhna zawh loh chang an nei fo a, dem chiam tur a ni bik kher lo ang.

Chutihlaiin tun ṭuma kan MP hi a danglam takna chu Lok Sabha inthlang tur dang zawng aia uara sawi theih turin tun ṭum inthlan dawnah khan candidate-te'n an tih tumte leh an vei zawngte an sawi a, campaign hunlaia tih duh a ngah tehlul nena thla thum dawn lai Parliament session neih chhunga thusawi lo mai ni lo, zawhna pawh zawt loa a awm tluan ta mai kha chu ama thusawi nen a inhmeh lo deuh a, an dem hi thil mak pawh a ni lem lo. 

A pawimawh ber erawh chu Parlia­ment-a zawhna zawh leh zawh loh ringawt hi MP ṭha tehna a ni lo a, chu bakah Parliament session hmasa ber chauh a la ni a, session lo awm zel turah ṭhahnemngai takin thu a la sawi ngei ang tih a rinawm. Parliament session hmasa bera a ngawih tluan avanga kan Lok Sabha MP tuna lo dem hmanmawh hi chu a la hma lutuk deuh lo maw?