Ramri

Tun hnai khan Aizawla veng lailía awm pahnih Chanmari leh Zarkawt veng ramri chung­changah inhriatthiam lohna a awm avangin MacDonald Hill-a School Education Directorate thlangah veng pahnih ṭhalaite pung khawmin an inep a, venhimna hna thawktu police nen rei vak lo an innawr buai hman a, buaina leh harsatna lian tham a thleng zui lo. 

Ramri chung­changa buaina hi veng leh veng, khua leh khua bakah ram leh ram inkarah a awm fo a, thil thar a ni lo a, a tawpna tur pawh a ni kher lo ang. A ral thlirtu tan chuan thil holam tak angin a lang mai thei a, ṭhenkhat chuan buai­na awm lo tak ang hialin an ngai a, a khawih tel veng pahnih tan erawh thil pawimawh tak, buai chhan tling a ni. 

Ramri buai a nih tawh chuan 'Kan huam chin' kan tih a inan loh vang emaw, a lehlama sawi dawn chuan a inan vang emaw a ni ṭhin. Aizawla veng pahnihte pawh hi an ram chin nia an hriat dan a inang lo. Hetiang deuh hian khaw hrang hrang leh veng hrang hrang hian ramri buaina hi an lo tawk ve fo tawh a, Mizoram chhung bikah hi chuan buaina lian tham thleng loin a fel ve leh mai ṭhin. 

He ramri buaina tenau thleng hian Mizoram leh Assam ramri buaina min mitthla tir thiam se, ramri chin nia ngaih humhim tura mi a pen chhuah tawh ngat chuan amahah ramri pawimawhzia a chiang thar a, ram humhim duhna a lian a, a chhunga cheng mipuite pawhin an ram chin neih hlen ngei duhna an nei thar ṭhin. 

Mizoram leh Assam ramri pawh hi kan ral thlir a, ziaka chinfel tuma kan nghah mai mai hi chuan a fel tak tawk dawnin a lang lo. Tharum thawha zuk bei chiam kher loin kan ram chin ngei humhim turin eng emaw chu ti ve ila, Assam lam an rawn chet apianga chhang let mai lo hian, ramri humhim tur hi chuan a taka pen chhuah a ṭul chang a awm a; hei hian ramri buai chinfelna kawngah rah ṭha tak a chhuah fo a ni.