Ramria DC-te dinhmun leh ramri buaina

Kolasib DC leh Cachar DC-te chu tun hnai khan Kolasib-ah an inkawm a, state pahnih ramri chungchang leh boruak muanawm a awm zui zel theihna turte an sawiho a, Assam inthlan lo awm tura boruak muanawm tak a awm theih dan turte an sawi bawk. 

Mizoram leh Assam ramria buaina a chhuah khan Kolasib leh Cachar DC-te hi a buai ber an ni a, district pawimawh enkawltu an nih avangin an mawhphurhna pawh a sang hle a nih kha. Thutlukna siam sual palh chuan thisen in chhuah tawnna thlenga thil thleng thei a nihlaiin, buaina lian tham tak chhuak loin an ching­fel thei a, a lawm­awm hle a ni.

Hetihlai hian Mizo mipui enghelh ber 'ramri' erawh chinfel a la ni lo a, ramria buaina chhuak chinfel a lawmawm rual hian a ramri ber a la chiang lo erawh lawmna a kim lo. Mizoram sorkar chuan kan ramri tia a pawm chu 1875-a ramri kha a ni a, hei hi Home minister pawhin nikuma ramri buaina a awmlai khan kan state ramria kan pawm a nih ngei thu a sawi. 

Tunah hi chuan kan ram chin nia kan pawm hi kan luah thei lo a ni mai lo a, kan luah chin pawn Assam lamin min rawn nêk ta zel niin a lang a, a vanduaithlak hle a ni. Nikuma ramria buaina awm kha mi ṭhenkhat chuan political party hamṭhatnaa lak an tum a, ramria buaina chhuak chinfel thawkhata awm chu ramri tifel tawh anga lo sawi mai duhte an awm a, a pawi hle a ni. 

Thil nihna tak kan sawi chhuah duh chuan, Mizote hian kan ramri nia kan pawm hi kan luah phak lo nasa a ni. Tunah hian Assam-in kan ramri chhungah police station an nei a, sorkar building tam tak an neih bakah kan ram chhung ngei chu an ta chei mek a ni. He kan ramri kan kawh hi kan neih lêta kan luah ngei theihna tura hmalakna a la awm lo a tih theih a, Lailapur bula buaina chhuak a reh zui tak avang hian kan ramri hi chinfel a la ni lo tih kan chian a ṭha hle ang. 

Tuna sorkar leh NGO-in kan ramri kan tih hi nei let tur chuan state sorkar hruaitute'n ke pen an inhuam a ngai a, DC-te hi chuan buaina chhuak tur ven hi an tih theih a ni mai si. Kan ramri aia thûk daihah check gate kan siam a, chumi kan pelh hlek pawhin Assam-in buai an cho ta zel a, 1875-a ramri kha eng tikah tak luah leh thei ang maw?