Zirtirtu lak

Mizoram sorkarin tun hnaia muster roll (MR)-a primary school leh middle school zirtirtu 881 a lak chungchangah, thil fel tâwk lo leh siamṭhat ngaiah a ṭul anga hmalak a ni dawn tih Chief Minister-in a sawi a, he thu hi tun hnai khan MNF treasurer chuan Mizo Hnam Rûna inkhawmah a puang. 

Mizoram sorkar hnuaia hna lak dana sawi hlawh ber pawl chu tun hnaia sorkarin MR-a zirtirtu a lak hi a ni awm e. Lâk an nih hma, a dil thei chin an tihchhuah aṭang tawhin inhnial­na a awm tawh a, Mizorama rorelna in sangah pawh zirtirtu lak tum a nih aṭangin sawi a lo hlawh hial tawh a ni. 

Zirtirtu chu lak fel a ni ta a, sorkar lamin a list pawh tichhuakin chhungkaw tam tak chu lawm em emin hna thar an hmuh avangin Pathian hnena lawmthu sawinate an nei hman hial tawh a, tunah chuan ‘ennawn’ a nih tur thu a lo lang. Result ennawn tur thu puangtu hi School Education minister a ni lo a, Chief Minister pawh ni loin ruling party lama an hotu zinga miin CM thusawi a puan chhawn a ni. 

Mizorama kan ruling party lamin sorkar hna lak chung­changa thu an neih lenzia tilangtu chiang tak chu tun hnaia thil thleng hi a ni. Political party inkhawmah kan rama sorkar sikula zirnaa mawhphurtu tur hna lak ennawn a nih tur thu chu party miin a puang a ni. A fuh lo lai chu an puanna hmun leh a puangtu lam hi a ni a, a mimala va dem tur lam ni loin a kalphunga hi a fel lo lai tak chu a ni. 

Engpawhnise Mizoram sorkar hnuaia hna lak sawi hlawh tawh tak chuan sawi a la hlawh chhunzawm zel dawn a nih hmel a, dik taka huaisen taka kalpui theih ni se a ṭha ngawt mai.