Hnam hnatlang ‘tak tak’

YMA sub-headquarters, Lunglei chuan Tripura relief camp-a awm mek Bru, Lunglei district chhunga electoral roll-a thun thar mi 200 chuangte paih an nih theih nan feh chhuah an tum thu an puang. 

Mizoram mipuiin Mizoram electoral roll-a hnam dang dan loa thun kan duh lohzia kan lantir tawh a; Assembly inthlan dawnah Bru leh Chakma-te duhsak tumna duh lo ngamtu Mizo officer ṭha tak chu Election Commission-in chhan dang awm miah loin an sawn a, kan duh lohzia kan lantir tawh a, ‘hnam hnatlang’ kan lo ko tawh a ni. 

Electoral roll buaipui a hun leh dawn ta a, Mizoram chhunga awm lo, danin a phut anga Mizoram chhunga an tih tur pawh rawn tifel lote hian electoral roll-a telh ngei an tum leh ang. Chung mite chu dan hmanga dodal an ṭul a, chumi piah lamah dan loa electoral roll-a a ruk a rala thun luhte pawh hi paih ngei an ngai a ni. 

Mizote hian thil hi kan chik tawk lo fo a, hei vang hian a tlai tawh hnuah ke kan pen a, pawr takin thil kan nawr a, dan hmaa kan thiam zawk loh chuan a dingchang zawkah kan ṭang lo leh ṭhin. Tun hi electoral roll buaipui hunlai a ni a, Mizo hnam himna tura dan hmanga pen chhuakte tha tichak turin mipuite ṭan rual a hun.

Hnam hnatlang kan nei tawh a, hlawh­tling khat chuan kan hlawhtling a, kan duh loh hnam dang officer chu state pawnah sawn chhuah a ni. Kha kha a pawimawh ber a ni lo a, kan duh loh tak hnam dangte Mizoram electoral roll-a an awm belh lohna tur leh, dan loa electoral roll-a awmte paih an nih ngei theihna turin Mizo zawng zawng ṭangrual ila, hmalatute i thlawp tlat ang u.